اسلام آباد۔ 22 دسمبر (اے پی پی) سیاسی و راجی راہشونک پارینو کہ ننے پاکستان ءِ قائد اعظم محمد علی جناح نا تغ انا عملی تعبیرا کن درست سمت انا تعین ءِ کروئی مریک، بابائے قوم انا فرمودات آتیا عمل کرسا ملک ءِ شونداری نا کسر آ روان کننگ مریک ، قائد اعظم محمد علی جناح نا سخت انگا کوشست آتے اٹ پاکستان جوڑ مس و داسہ دانا رکھ و دادے شون ہلوک جوڑ کننگ ننااجتماعی زمواری ءِ۔ پنچ شنبے نادے قومی اسمبلی نا قائمہ کمیٹی خارجہ امور نا چیئرپرسن نزہت صادق ’’اے پی پی‘‘ تون ہیت وگپ کرسا پارے کہ قائد اعظم محمد علی جناح وڑنری راہشون اس ئس۔ بابائے قوم سخت خواری و کوشست اٹ برصغیر نا مسلمان تے کن جتا ءُ وطن اس دوئی کرے۔ اوپارے کہ ہراتم پاکستان جوڑ مس تو ہمووخت آ بھاز انگا مشکل آک مون تروک ئسر ولے قائد اعظم محمد علی جناح عزم و ہمت نا درشانی ءِ کرسا ورنا و سرکاری آفیسر آتیان تران اٹی خواری نا اہمیت ءِ تالان کرے، اوپارے کہ ہر بندغ ءِ ہرا زمواری تننگانے اودے بایدے پورو کننگے۔ اوپارے کہ قائد اعظم محمد علی جناح نا فرمودات آتیا عمل کرسا ملک ءِ شون ہلوک ملک آتا صف اٹ اوار کننگ مریک۔
