سوچی۔30نومبر(اے پی پی) سوچی ءَ مزن وزیر شاہد خاقان عباسی ءَ روس ءِ مزن وزیر دمتری میدیو ءَ گندءُ نندءُ کتگ، مزن وزیر ءَ پاکستانی اُلس ءِ جزبگ آئیءَ را سرکتگ اَنت، اے موھءِ سرءَ دوھیں روہنما آں دونیمگی سیادی ءِ سرءَ سدکّیءِ درشانی کتگ۔ مزن وزیر شاہد خاقان عباسی ءَ گشتگ کہ پاکستان روس ءِ گوما وتی سیادی ءَ را سک باز ارزشت دنت۔ گندءُ نندءِ تہا دوھیں ملک آنی دونیمگی سیادی ءَ را بازیں پڑآنی تہا گیش کنگءِ سرءَ ھم تپاک کنگ بوتگ۔ مزن وزیر ءَ گندءُ نندءِ تہا ماسکو ءَ 28تاں 30نومبر 2017ءَ بوتگیں پاک روس بین الحکومتی کمیشن ( آئی جی سی ) ءِ پنچمی دیوانءِ تہا بوتگیں کارانی سرءَ سدکی ءِ درشانی کتگ۔ آئیءَ گشتگ کہ کمیشن ءِ دیوان ءَ سولءُ ترانءِ نیجگءَ بیپاری، توانائی، وانگءُ زانگ ، صنعت ، سائنس ءُ ٹیکنالوجی ءَ ھوار ٹرانسپورٹ ءِ پڑاں دونیمگی سیادی ءَ را گیش کنگءَ کمک رسیت۔ گندءُ نند ءِ تہا مزن وزیر آں دیمپانی ءِ پڑءَ دونیمگی کمک ءَ را گیش کنگءِ سرءَ تپاک کتگ۔ مزن وزیر شاہد خاقان عباسی ءَ روسءِ مزن وزیر ءَ را پاکستانءِ ترءُ تاب کنگءِ صلہ جتگ کہ آئیءَ قبول کتگ۔
