سی پیک ڈٹ انا رداٹ 9 اقتصادی زون جوڑ جاڑ کننگک، داڈٹ شونداری نا انجن ءِ ہراڑآن ہڑتوم آ ملک آتے فائدہ مریک

چین پاکستان اقتصادی راہداری نا ڈپٹی پروجیکٹ ڈائریکٹر حسن داؤد نا ورکشاپ آن تران
اسلام آباد۔ 16 اکتوبر (اے پی پی) چین پاکستان اقتصادی راہداری نا ڈپٹی پروجیکٹ ڈائریکٹر حسن داؤد پارینے کہ سی پیک نا رداٹ 9اکنامک زون جوڑ جاڑ کننگک ہراڑآن چین دنیا نا کیہی ڈیہہ تون ڈغاری و واپاری رابطہ غاتے قائم کننگ کیک۔ نومبر و دسمبر اٹی سی پیک نا بابت پین خوش خبری الس ءِ ملک۔ سی پیک شونداری نا انجن ءِ ہراڑآن ہڑتوم آ ملک آتے فائدہ مریک۔ پاکستان تینا ویژن 2025ء آ روان ءِ ہرانا رداٹ ملک دنیا نا 25بھلا معیشت آتیٹی اوار مریک۔ داخیال آتا درشانی ءِ او دوشنبے نادے اسہ نجی ہوٹل اسے ٹی جاری صنعتی زون آ علوم نا تبادلہ نا سرحال آن ٹریننگ ورکشاپ اٹی تران اٹی کرے۔ اوپارے کہ 2013ء ٹی نن سی پیک آ ہیت وگپ نا بناءِ کرین ہراڑآ چین 2015ء ٹی اسہ ڈیہہ و اسہ روڈ اسے نا ویژن نا درستی راستی ءِ کرفے۔ اوپارے کہ ہفت می جے سی سی میٹنگ ہنداسال نومبر اٹی پاکستان اٹی مریک ہراٹی پین خوش خبری بننگ نا اومیت ءِ۔ اوپارے کہ 2013ء ٹی پاکستان اٹی توانائی نا تنکی ئس ہرانا بھلو حد اسسکان نن مون ءِ تورینن۔ اونا پاننگ ئس کہ پاکستان اٹی سی پیک نا رداٹ 9 اقتصادی زون جوڑ جاڑ کننگک ہراڑآن چین دنیا تون ڈغاری و واپاری رابطہ غاتے قائم کننگ کیک۔ حسن داؤد پارے کہ داڈٹ آتیان ننا معیشت سوگو مریک و واپار اٹی ودکی مریک۔ اومستی پارے کہ ایچ ای سی و چین نا نیام اٹ مفاہمتی یات داشت آتیا دستخط مسنے ہرانا کمک اٹ چین نا بزنس اسکول پاکستان نا دورہ ءِ کیک۔ داڈٹ انا اسہ اہم انگا تمبہ سکیورٹی ءِ ہرانا کمک اٹ پاکستان اٹی 4لکھ خلقت ءِ روزگار ملنگ نا گمانءِ۔ اوپارے کہ داڈٹ آ باضابطہ نظام نا رداٹ کننگ انگ ءِ ہراٹی 2020 ء اسکان دا پروجیکٹ نا بناو 2025ء اسکان ودیکی و پین گچینی اتنگک۔ اوپارے کہ2019 ء اسکان ویسٹ کوریڈور نا کاریم ءِ پورو کننگک و ولدا ایسٹرنٹ کوریڈور آ کاریم نا بناءِ کننگک۔ داوخت آ اوانڈسٹریل زون جوڑ کننگ وجاری پروجیکٹ نا ذکر ءِ کرساپارے کہ بورڈ آف انویسٹمنٹ داڑآکاریم کننگ ءِ و زوت دادے ایسری اسکان سرکننگک۔ داوخت آ چینی چاہندار آک ہم تران کریر۔