ملک اٹی جمہوریت نا سوگوی آن ہی شونداری مریک، داکان بیدس پین ہچ ءُ کسر اس اف ، مسلم لیگ (ن) نا حکومت نا گدینگوک آ چارسال انا سرسہبی کم افس، داگدرینگوک آ 15سال انا کاریم تیا زیات ءُ، 2018 ء نا گچین کاری تیٹی الس نا انت کہ فیصلہ اس مریک اودے پاکستان نا الس امنا کیک
جھنڈیال (فتح جنگ) ۔ 13اکتوبر(اے پی پی) وزیراعظم شاہد خاقان عباسی پارینے کہ ملک اٹی جمہوریت نا سوگوی آن ہی شونداری مریک داکان بیدس پین ہچ ءُ کسراس اف، ٹیکنوکریٹ یا غیر جمہوری حکومت آک پاکستان ءِ نئے تو وخت اس فائدہ تسنو و نئے تننگ کیرہ۔ مسلم لیگ (ن) نا حکومت نا گدرینگوک آ چارسال انا سرسہبیک کم افس، دادکان مست انا 15سال انا کاریم تیان زیات ءُ، 2018 ء نا گچین کاری تیٹی الس نا انت کہ فیصلہ اس مریک اودے پاکستان نا الس امنا کیک۔ اوداہیت ءِ جمعہ نادے اسلام آباد آن کم و ود 83کلومیٹر مر ضلع اٹک نا علاقہ جھنڈیال اٹی تیل و گیس انا خننگ انگ نا ڈٹ انا بنائی دود آن تران کرساپارے ۔ داوخت آ وزیراعلیٰ پنجاپ شہباز شریف ، بنجائی وزیر شیخ آفتاب ، وزیر دفاع خرم دستگیر ، وزیر مملکت جام کمال خان، باسک قومی اسمبلی ملک اعتبار خان، صوبائی وزیر معدنیات چوہدری شیر علی، پاکستان آئل فیلڈ انا چیئرمین و سی ای او شعیب ملک و علاقہ نا سرکڑدہ غاتا بھلو کچ اس ساڑی ئسر۔ وزیراعظم پارے کہ ملک اٹی ہمہ جہت شونداری مننگ ءِ دا ہمو پالیسی تا سوب ءُ ہرا فتا محمد نواز شریف بناءِ کرے و نن اوفتے مون آ دننگ اُن۔ داہمو سرسہبی ءِ ہرا 2013ء نا گچین کاری تا سوب آن ملک ءِ دوئی مس۔ ہمو وخت الس ہرافیصلہ ءِ کرے اینو اونا بھرمک ملک وقوم ءِ ملنگ ءُ ، گدرینگوک آ چارسال اٹی دوئی مروک آ سرسہبیک کم افس۔ وزیراعظم غٹ جماعت آتے چیلنج کرے کہ او 1999ء آن ہلیس 2013ء اسکان نا کاریم تے اسہ کنڈآ تخر و معیشت تون اوار ہراکہ بشخ ءِ ہلیر، انشاء اللہ ننا چارسال انا کاریم دا15سال آن زیات ملرہ۔ وزیراعظم دوٹوک لوز آتیٹی پارے کہ ملک اٹی شونداری بیرہ ہمووخت آ مننگ کیک ہراتم ملک اٹی جمہوریت شون ہلیک۔ جمہوریت سوگو مریک تو ملک اٹی شونداری مریک۔ داکان بیدس پین ہچ ءُ کسر اس اف۔ اوپارے کہ ٹیکنوکریٹ یا غیر جمہوری حکومت آک پاکستان ءِ نئے وخت اس گڑاس تسنو نئے ایترہ، ملکی شونداری و شونہالی کن ننے جمہوریت ءِ سوگو کروئی ءِ۔ ننے اگست 2018ء نا گچین کاری ٹی بشخ ہلوئی ءِ و انت کہ فیصلہ اس مریک اودے پاکستان نا الس امنا کیک۔ وزیراعظم علاقہ ٹی تیل و گیس انا خننگ انگ آ علاقہ والا، پی او ایل و اٹک آئل نا کمامدار وکارندہ غاتے مبارکباد پیش کرسا پارے کہ بھلو وخت اسے آن پد پنجاپ اٹی تیل و گیس انا اسہ بھلوکوڑی اس خننگانے و کنے پورو یخین ءِ کہ آخبت اٹی داوڑنا پین کوڑی خننگک، ای پی او ایل و اٹک گروپ ءِ قومی شونداری و شونہالی نا دااہم ڈٹ اٹی زرکاری آمبارکبادی ایتیوہ ہرافک 15ارب روپئی نا زرکاری کرینو۔ دافیلڈ آن 21ملین کیوبک فٹ ہڑدے گیس دوئی مریک۔ داہنداخہ گیس ءُ ہراخس راولپنڈی و اسلام آباد اٹی یخ انا موسم اٹی ہڑدے کاریم اٹ اتنگ انگ ءِ۔ داکان بیدس دونیم ہزار بیرل ہڑدے تیل و 50 ٹن ایل پی جی ہم دادُون آن دوئی مریک، دابھلو خوشخبری اسے و ای غٹ ہندی خلقت ءِ مبارکبادی ایتیوہ انتئے کہ داکوڑی نا خننگ انگ آن علاقہ ٹی گیس انا فراوانی آن بیدس خلقت ءِ ملازمت و روزگار نا وارخواہی دوبریک۔ وزیراعظم پارے کہ توانائی تنکی نا ایسری کن حکومتی گام گیج آتا سوب اینو نن داقابل مسونن کہ گیس ءِ کاریم اٹ اتوک آ غٹ اُرائی، صنعتی، کشاری صارف و پاور پلانٹ آتے 24گھنٹہ گیس رسینگ انگ ءِ۔ وزیراعظم پارے کہ ساڑی حکومت نا دور اٹی 103ریکارڈ کوڑی خننگاہرافتیان 850 ملین کیوبک فٹ گیس نظام اٹی اوار مس ہرا پاکستان نا کل پیداوار نا 22درسد ءِ، داکان بیدس 32000 بیرل تیل انا ودکی مس ہرا پاکستان نا کل پیداوار نا اسہ تہائی ءِ۔ وزیراعظم پارے کہ داغٹ سرسہبیک ہمو پالیسی تا نتیجہ غاک ءُ ہرافتے الس نا شونداری و شونہالی کن محمد نواز شریف نا سرکڑدہ ہی ٹی 2013ء نا گچین کاری تیان پد جوڑ مروک آ حکومت بناء کرے و ہرافتے نن اینو مون آ دننگ اُن۔ وزیراعظم پارے کہ ہراوخت آن پاکستان جوڑ مسنے مچ آ پاکستان اٹی ڈیم و پاور پلانٹ خلسا ہرابجلی ودی مس او 20 ہزار میگاواٹ نا لگ بھگ ئس، ساڑی حکومت چار سال اٹی دہ ہزار آن زیات میگاواٹ بجلی سسٹم اٹی اوار کرے، توانائی تنکی نا بابت ہدف آتے پورو کننگا۔ دا ہدف آتے پورو کننگ اٹی نن مشکل آتون مون تروئی تماولے نن اوفتا مقابلہ ءِ کرین و سرسہبی دوئی کرین ، اینو ہم ننے چیلنج آک مون تروک ءُ ولے ہمو چیلنج و ویل آتا مون ءِ توننگ کن نن تینا کوشست آتے برجاتخنہ و داملک ءِ شونہالی و شون ہلوک ءُ ملک اس جوڑ کینہ ہراڑے السی ویل آک ایسر مریرہ و معیشت سوگو مریک۔ ویل آک ہم کم مریرہ و ولدا فیصلہ الس تون ءِ و او اگست 2018 ء ٹی تینا فیصلہ ءِ کیرہ۔ وزیراعظم السی نمائندہ غاتا کنڈآن 50 خلق ءِ گیس انا فراوانی نا خواست آ علاقہ نا غٹ خلق ءِ گیس انا فراوانی نا پڑو کرسا پارے کہ داکنا زمواری ءِ کہ مچ آ علاقہ نا غٹ خلق اٹی گیس تننگے۔ السی نمائندہ غاتون صلابت کننگک و دا مچ آ علاقہ ءِ گیس تننگک انتئے کہ دا علاقہ نا الس نا حق ءِ ۔ حکومت دارداٹ غٹ درکار فنڈ آتے فراوان کیک۔ وزیراعظم داوخت آ اٹک پٹرولیم نا مسکوہی چیئرمین وسعودی کاروباری شخصیت غیث راشدنا خذمت آتا ستاءِ کرسا پارے کہ اونا بھلو کڑد اسے، داملک اکن او انتس کہ کرینے اوتاریخ نا بشخ اس مریرہ۔ دود آن وزیراعلیٰ پنجاپ شہباز شریف ہم تران کرے۔
