اسلام آباد۔ 13اکتوبر (اے پی پی) وزیر مملکت اطلاعات و نشریات و قومی میرات مریم اورنگزیب پارینے کہ صحافی تا سیکورٹی و رکھ انا بل انا بنائی مسودہ منظوری کن بروک آ ہفتہ کابینہ نا کانود ساز کمیٹی ٹی پیش کننگک، سلاہ ئی بل اٹی صحافی تے کن ویلفیئر فنڈ انا اڈتننگ نا سلاہ و صحافی تا رکھ انا بابت اقوام متحدہ نا گائیڈ لائن آتے ہم اوار کننگانے و مسودہ غا ملک انا غٹ صحافی تنظیم آتون صلابت کننگا، پیمرا کانود نا رداٹ ہر ٹی وی چینل کن ایڈیٹوریل کمیٹی نا مننگ المی ءِ، ہر گڑا پیمرا نا کمک اٹ کنٹرول مننگ کپک، پی ٹی وی آ عئید شو اٹی اسہ قومیت نا مسخرہ خلنگ نا معاملہ بے کچ سنجیدگی اٹ ہلکونے، معاملہ غا پروڈیوسر، سکرپٹ رائٹر و ایڈیٹوریل کمیٹی ءِ معطل کننگا۔ پنچ شنبے نادے سینیٹ نا قائمہ کمیٹی اطلاعات و نشریات ءِ چندی معاملہ غاتیا بریفنگ ترسا وزیر مملکت مریم اورنگزیب پارے کہ جان جوڑی نا بابت اسہ اشتہار اس ہم تعلقدار مستند ادارہ غاتا منظوری آن بیدس تننگ مفک۔ میڈیا ٹی نشر کروک آ مواد نا بابت مہالوآن بھاز سخت ءُ کانود اس ساڑی ارے و ضابطہ اخلاق ہم ارے۔ اوصحافی تا رکھ و ویلفیئر بل 2017 ء نا بابت کمیٹی ءِ پارے کہ باسک آتیامبار حکومت ءِ ہم صحافی تا رکھ انا بابت گڑتی ءِ۔ پاکستان اٹی صحافی تا سلامتی ، شرحالی و ویلفیئر نا ویل ءِ، مسکوہی وزیراعظم محمدنواز شریف داویل انا ایسری کن پارت تس و دارداٹ مچ آ پاکستان نا پریس کلب، سی پی این ای، اے پی این ایس تون اوار ہر اسٹ تون صلابت کرے ، آر آئی یو جے ءِ بل انا مسودہ ءِ گدریفے، مچ آ پاکستان آن داڑآ سلاہ بس ولے 18 می ترمیم آن پد نن بیرہ قومی کہول آ کانود سازی کننگ کینہ۔ اوپارے کہ داکانود نا اولیکو ڈرافٹ آ وزارت کانود تون ہیت وگپ مسنے۔ اوپارے کہ بھاز انگا خلقت دابل آن خوش ہم اریر و ناخوش ہم اریر ولے ننے آجر و آجیر نا معاملہ غاتیٹی بایدے فریق جوڑ مفن تینٹ حکومتی ادارہ غاتیٹی ہم ملازمت آتا بابت سنجیدہ ویل آک ءُ۔ صحافی تا موقف ءِ کہ اوفتے روزگار نا رکھ ہم تننگے۔ حکومت میڈیا ہاؤس و صحافی تے اوفتا کسبی معاملہ غاتے پورو کننگ نا وخت سیکورٹی نا فراوانی نا زموار ءِ۔ اوپارے کہ داپوسکن آ بل اٹی کمیٹی نا باسک آتا سلاہ و اقوام متحدہ نا گائیڈ لائنز آتے ہم مون آ تخنگانے ولے ہر ڈیہہ نا تینا گرج آک مریرہ۔ اوپارے کہ غٹ باسک آتا دافرض ءِ کہ او داحالیت آتیٹی ننتون کمک کیر۔ اوپارلیمنٹرینز آتا دستارتے چکنگ نا بابت اسہ سوج اسے نا ورندی ٹی اوپارے کہ پارلیمنٹ نا باسک آتا کالعدم تنظیم آتون تعلق و دہشت گردی نا مون آ دننگ نا دوبہ غاتیا مبنی فہرست جعلی ئس، آئی بی اونابرخلاف ایف آئی آر اندراج کرفینے۔ اوپارے کہ وزارت اطلاعات نا گڑاس ماتحت ادارہ غاتا دفتر آک کرایہ نا ماڑی تیٹی ءُ۔ اوفتے ٹی پی آئی وی، ای پی ونگ، آئی آر ایس، اے پی پی تون اوار ایلو ادارہ غاک اوار ءُ۔ وزارت تون چندی جاگہ غاتیا پلاٹ ساڑی ارے نن وزیراعظم ءِ سلاہ تسونن کہ دامحکمہ غاتے اسہ پوسکن و زیباءُ چھت اسے نا کیرغ میڈیا ہاؤس آتیامبار یکجا کننگے۔ اوپارے کہ نجی بشخ انا اولیت آتیٹی کمرشل مواد زیات اہمیت تخک۔ چناتا مواد آن چینل آتے زیات ریونیو دوئی مفک۔ نن اے ٹی وی ٹی دا نا تجدید کن چلڈرن کنٹینٹ نا کچ ءِ ودفنگ کن اوڑتون ہیت کرین۔ دنیا ٹی چلڈرن چینل اس قائم ءِ۔ اسہ سال اکن اے ٹی وی نا معاہدہ نا تجدید کرینن۔
