اسلام آباد۔ 13اکتوبر (اے پی پی) صدر مملکت ممنون حسین پارینے کہ داخلی سلامتی آ اثرانداز مروک آ خارجی عوامل آتیا اول سرآن سجفسا دانش مندانہ حکمت عملی اس تیار کننگے انتئے کہ کشمیر، بھارت، اوغانستان ، ایران ، دے ٹکی نیامی و چین نا حالیت براہ راست ننا داخلی سلامتی نا معاملہ غاتیا اثرانداز مریک۔ اوداہیت ءِ جمعہ نادے داڑے نیشنل ڈیفنس یونیورسٹی ٹی نیشنل سیکورٹی ورکشاپ نا ایسری دود آن تران کرسا پارے۔ ورکشاپ اٹی پارلیمنٹ نا باسک، بڑزکو سول و فوجی کمامدارو سول سوسائٹی نا بندغ آک شریک ئسر۔ صدر مملکت داوخت آ ورکشاپ نا ساڑی مروک آتیٹی سرٹیفکیٹ ہم بشخ وپانٹ کرے۔ صدر مملکت ورکشاپ نا ساڑی مروک آتیان تران کرسا پارے کہ عسکریت پسندی و دہشت گردی نا چیلنج آتون مون تننگ کن قوم جان و مال و ادارہ جاتی کہول آتیا بھاز نسخان ہرفینے ولے داجنگ اٹی ننا بھلو سرسہبی اس ہم ارے ہراڑکن ننا سول و ملٹری جانباز آتیان بیدس سیاسی و غیر سیاسی خلقت ہم بیش بہا قربانی تسنو ہراڑآ داغٹ بندغ و ادارہ غاک خراج تحسین نا حقدار ءُ۔ اوپارے کہ داویل آتا ایسری کن المی ءِ داخلہ پالیسی تون اوار اوار خارجہ پالیسی نا گڑاس پلو آتا خیالداری اٹ جاچ ءِ ہلسا اوفتا اصلاح ءِ کننگے۔ صدر مملکت پارے کہ پاکستان اٹی گدرینگوک آ مسہ عشرہ ٹی بے کچ ترند رفتاری اتون بدلی رونما مس ہرانا ملک انا سیاسی، راجی واقتصادی معاملہ غاتیا ہم زہم ئس تما۔ داوخت آ این ڈی یو کے قائم مقام صدر میجر جنرل سمریز سالک ہم تران کرے وخت اس کہ سینیٹر روبینہ خالد، باسک پنجاپ اسمبلی شہریار ملک و سول سوسائٹی نا نمائندہ عامردرانی ورکشاپ نا سفارش آتیان سامعین آتے معلومدار کرے۔
