حکومت کاروبار نا مون آ دننگ کن سازگار فضاء ودی کننگ و جہانی مارکیٹ اٹی مسابقت نا حامل ملکی مصنوعات آتا تیاری کن ہروڑنا گام گیج چست کننگ کن پرعزم ءِ
اسلام آباد۔ 13اکتوبر (اے پی پی) وزیراعظم شاہد خاقان عباسی پارینے کہ حکومت کاروبار نا مون آ دننگ کن سازگار فضاء ودی کننگ و جہانی مارکیٹ اٹی مسابقت نا حامل ملکی مصنوعات آتا تیاری کن ہروڑنا گام گیج چست کننگ کن پرعزم ءِ۔ اوداہیت ءِ آل پاکستان ٹیکسٹائل ملز ایسوسی ایشن (آپٹما) نا ڈل اتون ہیت وگپ کرسا پارے ہرا جمعہ نادے وزیراعظم آفس اٹی اوڑتون اوڑدہی کریر۔ وزیر خزانہ اسحاق ڈار، وزیر واپارپرویز ملک، وزیراعظم نا خصوصی کمکار ہارون اختر و مفتاح اسماعیل و تعلقدار وزارت آتا سینئر کمامدارآک ہم اوڑدہی ٹی ساڑی ئسر۔ ڈل وزیراعظم نا برآمدی پیکج آ نظرثانی و ودکی آ وزیراعظم نا منت واری ءِ ہرفے ہرا نا مسخت مچ آ دنیا ٹی روائتی و غیر روایتی منڈی تا پٹنگ کن برآمد کنندگان آتے آسراتی فراوان کننگ ناءِ۔ ڈل ملک اٹی خاص کر صنعتی صارف آتے کن توانائی نا رکھ ءِ المی جوڑ کننگ کن حکومت نا کوشست آتا ستاءِ کرے۔ وزیراعظم حکومت نا دا عزم انا اعادہ ءِ کرے کہ کاروبار نا مون آ دننگ کن سازگار فضاء ودی کننگ و تینا مصنوعات آتے جہانی مارکیٹ اٹی زیات مسابقانہ جوڑ کننگ کن پالیسی گام گیج آتون اوار ہروڑنا گام گیج آتے برجاتخنگک۔ ڈل برآمد آتیٹی ودکی و اوٹی ملک انا واپاری نسخان اٹی کمتی اتنگ کن چندی سلاہ تے پیش کرے۔ سلاہ تا ورندی ءِ ترسا وزیراعظم پارے کہ حکومت ہموہرسلاہ غا کاریم کننگ کن تیار ءِ ہراڑآن برآمد آتیٹی صاف ءُ ودکی اسے المی جوڑ کننگ مرے و ہراڑآن واپاری نسخان اٹی کمتی و روزگار اٹی ودکی نا کٹیاک دوئی مریر۔ وزیراعظم وزیر واپار ءِ پارت کرے کہ او برآمد کنندگان آتون اوار تولے و اوفتے قابل عمل ٹھوس سفارشات پیش کے۔
