ملک اٹی جمہوریت ءِ ہرا پین وخت اس ہم سلک، جمہوریت اسہ دے انا ہیت اس اف بلکن دا پدریسہ ءُ عمل اسے ہراٹی ادارہ غاتے اسہ ایلو ءِ پہہ مننگ اٹی وخت لگک ، اینو نا پاکستان 2013ء نا پاکستان آن بھاز جوان ءِ داٹی ہچ ءُ شک اس اف کہ داسکان بھازانگا کاریمک سلوک ءُ ولے داہیت ضرور ارے کہ ننا دا4سال اٹی بھاز جوانی بسنے
اسلام آباد۔ 12اکتوبر (اے پی پی) وزیراعظم شاہد خاقان عباسی پارینے کہ ملک اٹی جمہوریت ءِ ہراپین وخت اس ہم سلک، جمہوریت اسہ دے انا ہیت اس اف بلکن دا پدریسہ ءُ عمل اسے ہراٹی ادارہ غاتے اسہ ایلو ءِ پہہ مننگ اٹی وخت لگک ، داخیال آتا درشانی ءِ او پنچ شنبے نا دے اسہ نجی ٹی وی چینل اسے نا پروگرام ’’نیوز آئی‘‘ ٹی ہیت وگپ کرسا کرے۔ اوپارے کہ مسکوہی وزیراعظم محمد نواز شریف نا نابودی آن پد اقتدار نا گدریفنگ نا عمل ءِ دُن تو الس امنا کتنے ، ولے داسہ داڑآ شفاف وڑاٹ عمل مسنے تو داجمہوریت نا فتح ءِ ولے ہراخلقت پارلیمنٹ نا باسک آتا نرنگ نا بارواٹی قیاس آرائی کریرہ اوفتے بوزاٹ کنوئی تماانتئے کہ داسہ ہارس ٹریڈنگ مستین نا اسہ کسہ اس جوڑ مسنے ہرا جمہوریت و جمہوری نظام نا کٹنگ ءِ۔ اوپارے کہ پاکستانی الس محمد نواز شریف ءِ 5سال اکن وزیراعظم گچین کریسس ولے محمد نواز شریف نا نابودی آن اسہ بدلی اس ضرور بسنے ہرادے نن امناکرین و جمہوریت ءِ ڈی ریل مننگ کن الیتون بلکن اودے مون آ درین، اوپارے کہ ای بطور وزیراعظم پاکستان تینا پارٹی نا پالیسی تے مون آ دننگ اُٹ، اسہ سوج اسے نا ورندی ٹی اوپارے کہ باسک قومی اسمبلی کیپٹن (ر) صفدر نا قومی اسمبلی ٹی بیان اونا جندی رائے ءِ ہرانا نئے تو ای زموار اُٹ و نئے ننا پارٹی، اواسمبلی نا فلور آ تینا ہراخیال آتا درشانی ءِ کرینے اوفتے ٹی او تینا پارٹی نا نمائندگی ءِ کتوکہ و نئے ویل اسے آ ہیت کریکہ بلکن پوائنٹ آف آرڈر آ ہیت کریکہ۔ ای پارلیمنٹ نا لیڈراُٹ ہنداخاطران ای اوڑتون دابارواٹی ہیت ہم کیوہ انتئے کہ داکنافرض ہم ارے۔ اسہ ہندن ءُ ہیت اس ہراڑآن اشتعال مرے و خلقت نا است اٹی وڑوڑنا گڑتی ودی مرے اوفتیان نن بایدے پاناد کین، اسہ پین سوج اسے نا ورندی ٹی وزیراعظم شاہد خاقان عباسی پارے کہ ننا ملکی معیشت نا 2013ء آن موازنہ ءِ کننگے تو دابھاز گچین و مستحکم ءِ۔ پاکستان مسلم لیگ (ن) نا ساڑی آ حکومت ملکی معیشت نا سوگوی کن دے و نن کوشست کننگ ءِ ہرانا مثبت نتیجہ ہم دوئی مننگ ءِ۔ وزیراعظم پاکستان نا پاننگ ئس کہ ای بنجائی وزیر خزانہ محمد اسحاق ڈار نا کارکڑد آن است جم اُٹ اوہم ملکی معیشت نا سوگوی کن دے و نن کاریم کرینے ہرانا سوب اینو ملکی معیشت نا سوگو مننگ نا جہانی کہول آ ہم امنا کننگ انگ ءِ ۔ اوپارے کہ اسمبلی ٹی اسحاق ڈار آن جوان ءُ پین اسے وزیر خزانہ اس ہم اف و نئے ننے ادارہ اس پارینے کہ نن اسحاق ڈار تون ڈیل کپنہ، دُن انگا ہیت آک بے بنداو ءُ ۔ اسہ پین سوج اسے نا ورندی ٹی اوپارے کہ ہرہموکاریم ہراڑآن ملک اٹی جمہوریت و شونداری نزوری نا گواچی مرے اودے سازش نا زمرہ ٹی بٹنگ کینہ۔ اسہ سوج اسے نا ورندی ٹی پارے کہ حسن و حسین نواز وطن آ پدی بننگ و تینا دفاع نا فیصلہ ءِ تینٹ کروئی ءِ تا، اسہ پین سوج اسے نا ورندی ٹی اوپارے کہ ایل این جی معاہدہ نا کٹیا و نسخان نا ای تینٹ زمواراُٹ انتئے کہ ای اودے وطن آ ایسونٹ، شیخ رشید نا دابدقسمتی ءِ کہ ای اودے چاوہ، کنے ہمو بندغ دوبہ خلے ہرانا تینا دوک صاف مریر، اسہ پین سوج اسے نا ورندی ٹی اوپارے کہ اینو نا پاکستان 2013ء نا پاکستان آن بھاز جوان ءِ داٹی ہچ ءُ شک اس اف کہ داسکان بھاز انگا کاریم تے کننگ سلوک ءِ ولے دا ہیت ضرور ارے کہ ننا دا 4سال اٹی بھاز گچینی بسنے۔
