اسلام آباد۔ 12اکتوبر (اے پی پی) وزیراعظم شاہد خاقان عباسی تون جاپان نا سفیر تاکاشی کورائی اوڑدہی کرے۔ وزیراعظم آفس آن جاری بیان نار داٹ اوڑدہی ٹی وزیراعظم شاہد خاقان عباسی پارے کہ جاپان پاکستان نا دوست و قابل پت معاشی شریدار ءِ ، پاکستان نا اقتصادی حالیت و امن و ایمنی ٹی نمان گچینی بسنے ، گچین امن و ایمنی کانود نافذ کروک آ ادارہ غاتا سرسہب کارروائی تا نتیجہ ءِ۔ ہڑتوم آ کنڈآتا تعلقداری تیا زور شاغسا وزیراعظم شاہد خاقان عباسی پارے کہ پاکستان جاپان تون کمکاری ءِ پین مون آ دننگ نا خواہندار ءِ، واپار، زرکاری ، بنداوی ڈھانچہ ، توانائی نا بشخ و ہڑتوم آ ملک آتا الس آں الس اسکان رابطہ غاتیٹی کمکاری ءِ ودفنگ خواہک۔ وزیراعظم پارے کہ پاکستان ٹیکسٹائل کن جاپان عارضی ٹیرف گام گیج آتا رداٹ پین مسٹ آن چار سال انا استثنیٰ غا سجفے تانکہ پاکستان دا بشخ اٹی تینا مسابقت کار آتا ہم پلو مننگ کے ہرافتے داوخت آ جاپان نا مارکیٹ اٹی آجو رسینگ دوئی ءِ۔ وزیراعظم جاپانی کمپنی تا کنڈآن پاکستان اٹی زرکاری نا ستاءِ کرسا پارے کہ داڑآن ننا صنعتی بشخ اٹی ودکی پیدوار اٹی کمک رسینگک۔ جاپان نا سفیر تاکاشی کورائی پاکستان اٹی اقتصادی شونداری نا ستاءِ کرسا پارے کہ جاپان اٹی پاکستان نا تصور یکسر بدل مسنے ، داسہ جاپان نا خلقت پاکستان ءِ کاروبار دوست ملک اسے نا وڑاٹ چارہ۔ اوپارے کہ پاکستان اٹی سلامتی نا امور، انفراسٹرکچر اٹی گچینی و کاروبار دوست چاگڑد جوڑ کننگ ءِ قدر انا نظراٹ ہرک۔
