اسلام آباد۔ 12اکتوبر (اے پی پی) وزیراعظم شاہد خاقان عباسی تون ایران نا سفیر مہدی ہنر دوست اوڑدہی کرے۔ وزیراعظم آفس آن جاری بیان نا رداٹ اوڑدہی ٹی وزیراعظم شاہد خاقان عباسی پارے کہ پاکستان برادر ملک ایران تون تعلقداری تے بے کچ اہمیت ایتک، ہڑتوم آ ملک آتا نیام اٹ برادرانہ تعلقداریک ءُ۔ اوپارے کہ ہڑتوم آ ملک آتا نیام اٹ واپار و زرکاری نا مون آ دننگ نا گنجائش ءِ۔ وزیراعظم ہڑتوم آ ملک آتا نیام اٹ بڑزکو کہول ڈل آتا ہن وبر آ است جمی نا درشانی ءِ کرے۔ وزیراعظم نیویارک اٹی ایرانی صدر حسن روحانی تون اوڑدہی نا ذکر ءِ کرے۔ ایران نا سفیر ایران نا سرکڑدہ نا کنڈآن نیک است خواہی نا کلہو ءِ سرکرے و پارے کہ ایران پاکستان تون تعلقداری تے بے کچ اہم سمجھک۔ اوپارے کہ پاکستان تون ہڑتوم آ کنڈآتا تعلقداری تے پین مون آ دننگ کن پرعزم ءِ ، ایران پاکستان تون ہر بشخ اٹی کمکاری نا مون آ دننگ نا خواہندار ءِ۔
