امریکہ ٹی پاکستانی سفیراعزاز چوہدری نا’’ایمبیسڈرزانسائیڈ رسیریز‘‘ پروگرام اٹی خیال آتا درشان

پاکستان امریکہ تون تعلقداری تے قدر انا نظراٹ ہرک، نن بے مثل قربانی ترسا دہشت گردی نا برخلاف جنگ اٹی نمان سرسہبی دوئی کرینن
اسلام آباد۔ 12اکتوبر (اے پی پی) امریکہ ٹی پاکستان نا سفیر اعزاز احمد چوہدری پارینے کہ پاکستان امریکہ تون تعلقداری تے قدر انا نظراٹ ہرک ہراہفت دہائی تیاٹی ءُ۔ چارشنبے نادے واشنگٹن ڈپلومیٹس توئی اخبار نا کنڈآن ’’ایمبیسڈرز انسائیڈرسیریز‘‘ پروگرام اٹی مہمان خاص نا حیثیت اٹ خیال آتا درشانی ءِ کرسا اوپارے کہ پاکستان و امریکہ نا نیام اٹ تعلقداریک ہفت دہائی تیا ٹی ءُ، پاکستان امریکہ تون تعلقداری تے قدر انا نظراٹ ہرک ، داٹی ہچ ءُ شک اس اف کہ مستین اٹی ہڑتوم آ ملک آتا نیام اٹ تعلقداری تیٹی شیف بڑزی بسنے ولے ہراوخت آ کہ ہم ہڑتوم آ ملک آک اواری اٹ کاریم کرینو اوڑآن بھاز فائدہ دوئی کرینو۔ اوپارے کہ مننگ کیک کہ داوخت ہڑتوم آ ملک آتا نیام اٹ تعلقداری تیٹی گڑاس غلط فہمی مرے ولے ہڑتوم آ ملک آک مثبت وجوڑجاڑی سرجزآتا کمک اٹ دانا مون ءِ توررہ۔ تینا بنائی ہیت آتیٹی اعزاز چوہدری ساڑی مروک آتے پاکستان اٹی سیکورٹی و اقتصادی حالیت و خاص کر گدرینگوک آ چار سال اٹی دہشت گردی نا برخلاف کوشست آتیٹی بے شمار سرسہبی تا بابت معلومداری تس۔ دود اٹی ساڑی آ و مسکوہی سفیر، کانگریس ، سینیٹ، عملہ و دفترخارجہ نا کمامدارو صحافیک ساڑی ئسر۔ اسہ سوج اسے نا ورندی ٹی اعزاز چوہدری پارے کہ پاکستان بے مثل قربانی ترسا دہشت گردی نا برخلاف جنگ اٹی نمان سرسہبی دوئی کرینے، دہشت گردی نا برخلاف جنگ اٹی پاکستان ءِ ارب آ ڈالر اقتصادی نسخان تون ہم مون تروئی تمانے وخت اس کہ سرسہب آپریشن تیٹی ملک اٹی دہشت گردی نا واقعہ غاتیٹی نمان کمتی بسنے، داس پاکستان جہانی کہول آ شون ہلوک ءُ معیشت اسے نا وڑاٹ مون آ بننگ ءِ۔ اعزاز چوہدری پارے کہ پاکستان ءِ اوغانستان نارداٹ بایدے ہُننگپ ، پاکستان 20 کروڑ آن زیات آبادی نا ملک و بے پناہ قدرتی وسیلہ غاتیان مالامال ءِ و اونا معیشت شونداری نا کنڈآروان ءِ۔