سوئی سدرن گیس کمپنی سندھ و بلوچستان اٹی گیس انا فراوانی نا ڈٹ 2ارب 24کروڑ 60 لکھ روپئی خڑچ کیک، کمامدار

اسلام آباد۔ 08 اکتوبر (اے پی پی) سوئی سدرن گیس کمپنی لمیٹڈ اینخو مالی سال اٹی صوبہ سندھ و بلوچستان نا 137 خلق آتے گیس انا فراوانی نا ڈٹ 2ارب 24کروڑ 60 لکھ روپئی خڑچ کیک۔ گیس انا دافراوانی وزیراعظم نا جہانی پائیدار شونداری نا ہدف پروگرام نا رداٹ کننگ انگ ءِ۔ سوئی سدرن گیس کمپنی لمیٹڈ نا کمامدارآک اے پی پی ءِ پاریر کہ ڈٹ انا رداٹ بلوچستان نا ہژدہ و سندھ انا 119خلق ءِ گیس فراوان کننگک ہراڑکن کمپنی 490 کلومیٹر مریس گیس پیپ لین شاغنگ نا کاریم سندھ اٹی کننگ ءِ وخت اس کہ 77 کلومیٹر گیس پیپ لین بلوچستان اٹی شاغنگ انگ ءِ۔ کمامدارآک پاریر کہ سندھ انا 119 خلق ءِ گیس انا فراوانی آ اسہ ارب 61کروڑ 62لکھ 43ہزار روپئی خڑچ بریک وخت اس کہ بلوچستان نا 18 خلق ءِ گیس انا فراوانی کن خڑچ انا تخمینہ 63کروڑ 4لکھ 30 ہزار روپئی خلنگانے۔ سرجم انجینئرنگ سروے کننگانے وخت اس کہ گڑاس خلق انا سروے کن ودکی فنڈ انا منظوری نا خواست کننگانے۔ کمامدارآک پاریر کہ داغٹ ڈٹ آک پارلیمنٹرینز نا باسک و او علاقہ غاتا قابل ذکر شخصیت آتا سفارش آتیا بناء کننگ انگ ءُ اسہ سوج اسے نا ورندی ٹی کمامدارآک پاریر کہ ہڑتوم آ سرکاری کمپنی سوئی نادرن و سوئی سدرن گیس پیپ لین لمیٹڈ تینا تینا علاقہ غاتیٹی گدرینگوک آ مالی سال اٹی کم وود 6 ہزار 129 کلومیٹر ٹرانسمیشن نیٹ ورک شاغانو۔ کمامدارآک پاریر کہ گدرینگوک آ سال ہڑتوم آ گیس کمپنیک مچ آ ملک اٹی تینا تعلقدار دنگ اٹی 3لکھ 60 ہزار 465اُرائی، 339 کمرشل و 20 صنعتی گیس کنکشن تسنو۔ داکان بیدس ہڑتوم آ کمپنیک ٹرانسمیشن ڈٹ آتیا 17925ملین روپئی، ڈسٹری بیوشن ڈٹ آتیا 11183ملین روپئی و ایلو ڈٹ آتیا 14925ملین روپئی زرکاری کرینے۔ داجم اٹنگا زرکاری 44633ملین روپئی جوڑ مریرہ ۔ اسہ پین سوج اسے نا ورندی ٹی کمامدارآک پاریر کہ پاکستان تون 12202کلومیٹر ٹرانسمیشن ، 119736 کلومیٹر ڈسٹری بیوشن و 32823کلومیٹر سروس گیس پیپ لین نا گیشتر ءُ نیٹ ورک اسے ہرانا کمک اٹ مچ آ ملک اٹی 8.4 ملین گیس صارف آتا گرج آتے پورو کننگک و ہردے ئی 4ارب کیوبک فٹ قدرتی گیس فراوان کننگک۔ اوفک اسہ سوج اسے نا ورندی ٹی پاریر کہ ہڑتوم آ کمپنیک گڑاس گچین کروک آ ہند آتیا ہراڑے قدرتی گیس انا سپلائی ساڑی اف ، کن 60 ایل پی جی ایئر مکس پلانٹ خلیک۔