متبادل ذرائع آن بجلی نا پیداوار دسمبر 2018 ء اسکان 2626میگاواٹ اسکان سرمریک

تہوانا کمک اٹ 1200 میگاواٹ و شمسی توانائی آن 1400 میگاواٹ پین ہڑزآن بجلی ودی کرسا 2020ء اسکان قومی گریڈ اٹی اوار کننگک
متبادل ذرائع آن توانائی نا پیداوار نا شونداری بورڈ انا رپورٹ
اسلام آباد۔ 08 اکتوبر (اے پی پی) متبادل ذرائع آن توانائی نا پیداوار نا شونداری بورڈ پارینے کہ ملک اٹی متبادل ذرائع آن بجلی نا پیداوار دسمبر 2018ء اسکان 2626میگاواٹ اسکان سرمریک وخت اس ک 2020ء اسکان تہوانا کمک اٹ 1200 میگاواٹ و شمسی توانائی آن 1400 میگاواٹ پین ہڑزآن بجلی ودی کرسا قومی گریڈ اٹی اوار کننگک۔ بورڈ انا ساڑی آ رپورٹ نا رداٹ داوخت ملک اٹی تہو آن بجلی ودی کروک آ 15جتاءُ پروجیکٹ کاریم کننگ ءُ ہرافتا کمک اٹ 788.5میگاواٹ بجلی ودی کننگ انگ ءِ وخت اس کہ 445میگاواٹ نا پین 9 ڈٹ آتا مالی معاملہ غاتے گڈیکو دروشم تننگانے۔ ہنداوڑ شمسی توانائی آن بجلی ودی کروک آ 4سولر ڈٹ آتا کمک اٹ جم وڑاٹ 400 میگاواٹ بجلی ودی کرسا قومی گریڈ اٹی اوار کننگ انگ ءِ و 30 میگاواٹ بجلی ودی کننگ نا حامل پین اِرا پوسکن ءُ سولر پروجیکٹ آتا جوڑ جاڑ ترندی اٹ برجاءِ۔ داکان بیدس ملک اٹی 5جتا ءُ شولر مل آتیٹی گنڈیری نا پھوگ انا کمک اٹ 160.1میگاواٹ بجلی ودی کننگ انگ ءِ وخت اس کہ گنڈیری نا پھوگ آن ودی کروک ءُ پین 30 ڈٹ آتا جوڑ جاڑ جاری ءِ ہرافتا کمک اٹ 1193.3میگاواٹ بجلی ودی مریک۔ ہنداوڑ متبادل ذرائع آن توانائی نا دوئی کننگ کن جوڑ جاڑ کروک آ چندی ڈٹ آتا پوروی آن پد دسمبر 2018 ء اسکان متبادل ذرائع آن دوئی مروک آ بجلی نا پیداوار 2600 میگاواٹ آن گدرینگک ہراڑآن توانائی نا کاختی نا ویل انا مون ءِ توننگ اٹی کمک رسینگک۔