بنجائی حکومت پٹرولیم و قدرتی وسیلہ ڈویژن نا چندی ڈٹ آتے کن 1914.770 ملین روپئی نا فنڈ جاری کرے

اسلام آباد۔ 08 اکتوبر (اے پی پی) بنجائی حکومت سرکاری بشخ انا شونداری پروگرام نا رداٹ اولیکو سہ ماہی ٹی پٹرولیم و قدرتی وسیلہ ڈویژن نا چندی ڈٹ آتے کن 1914.770 ملین روپئی نا فنڈ جاری کرینے۔ اینخو مالی سال اٹی دا بشخ انا چندی ڈٹ آتے کن جم وڑاٹ 3987.778ملین روپئی نا فنڈ جتا کننگانے۔ سرکاری حساب وکتاب نا رداٹ بلوچستان نا ضلع لسبیلہ نا علاقہ بیلہ و اوتھل اٹی دھاتی معدنیات آتا پٹنگ و جاچ ءِ ہلنگ کن 1.798ملین روپئی، ضلع نارووال نا تحصیل بدوملی و ایب وکیب علاقہ، سیالکوٹ نا قومی اسمبلی نا حلقہ این اے 112، ضلع لاہور نا حلقہ 129، شیخوپورہ نا حلقہ این اے 132، این اے چار پشاور، این اے 30 و 31سوات و شانگلہ و پی کے 27 مردان نا چندی علاقہ غاتیٹی گیس انا فراوانی کن جم وڑاٹ 1912.274ملین روپئی نا فنڈ جاری کننگانے۔ ہنداوڑ نیامی پنجاپ نا سالٹ رینج اٹی کولانا پٹنگ کن 0.698ملین روپئی نا فنڈ جاری مسنے۔ سرکاری حساب وکتاب نا رداٹ اینخو مالی سال اکن حکومت جیولاجیکل سروے آف پاکستان کن ڈرلنگ ریگز و ایلو سازوسامان تا دوئی کننگ کن 415.807ملین روپئی، بدین اٹی کولانا پوسکن آ کوڑی نا پٹنگ کن 37.977 ملین روپئی سالٹ رینج اٹی کولانا پٹنگ کن 3.492ملین روپئی تون اوار چندی ڈٹ آتے کن بھلو زراس جتا کرینے۔