انسداد دہشت گردی نا خصوصی عدالت نا ہڑتوم آتا میرات آتا سرجم آتے جمع کرفنگ نا پرمان، سماعت 13اکتوبر اسکان ملتوی
اسلام آباد۔ 06اکتوبر (اے پی پی) انسداد دہشت گردی نا خصوصی عدالت پاکستان تحریک انصاف نا چیئرمین عمران خان و پاکستان عوامی تحریک نا قائد ڈاکٹر طاہر القادری نا برخلاف درج پارلیمنٹ، سرکاری ٹی وی چینل (پی ٹی وی) و اہم انگا سرکاری ماڑی تیا جلہو و ایس ایس پی عصمت اللہ جونیجو بیداد کیس اٹی آئی جی پولیس و چیف کمشنر ءِ حکم تس کہ بروک آ سماعت آ عمران خان و طاہر القادری نا میرات آتا سرجم آتے عدالت اٹی جمع کرفنگے۔ جمعہ نا دے عدالت مقدمہ نا سماعت ءِ کرے تو ہڑتوم آ اشتہاری دوبہ دار عمران خان و طاہر القادری پیش متوس۔ عدالتی پرمان آ پولیس عمران خان و طاہر القادری نا میرات آتا ریکارڈ ءِ اینو ہم پیش کتوس۔ عدالت ریمارکس ترسا پارے کہ عمران خان و طاہر القادری نا میرات آتا سرجم آتے جمع کرفنگ اٹی پولیس بے سہب مسنے۔ عدالت حکم تس کہ آئی جی پولیس و چیف کمشنر بروک آ سماعت آ عمران خان و طاہر القادری نا میرات آتا سرجم آتے جمع کرفر۔ سماعت اٹی انسپکٹر لیگل انیس اکبر عدالت اٹی پیش مس و موقف اختیار کرے کہ ایس ایس پی عصمت اللہ جونیجو ملک آن پیشن ءِ بروک آ سماعت آ عدالت اٹی پیش مریک۔ عدالت کیس انا سماعت ءِ 13اکتوبر اسکان ملتوی کرے۔
