اسلام آباد۔ 04اکتوبر (اے پی پی) بنجائی وزیر صنعت وپیداوار غلام مرتضیٰ خان جتوئی تون ویتنام نا نائب وزیر واپار و صنعت کاؤکیوک ہونگ ڈل اتون اوار اوڑدہی کرے۔ بنجائی وزیر ڈل ءِ بخیر اٹ پارے و پارے کہ ویتنام نا صنعت و واپار داڈل انا دورہ غان پاکستان و ویتنام نا ودوک آ تعلقداری تا عکاسی مریک و داڑآن یقیناًہڑتوم آ ملک آتا نیام اٹ ہڑتوم آ کنڈآتا تعلقداری تیٹی ترندی بریک و ہڑتوم آ ملک آتا چندی بشخ خاص کر واپار ، زرکاری و تین پہ تینی است خواہی نا بشخ آتیٹی تعلقداریک پین گچین مریرہ۔ غلام مرتضیٰ جتوئی پارے کہ پاکستان تزویراتی لحاظ اٹ مچ آ ڈیہہ نا بنجاٹی واقع ءِ۔ پاکستان قدرتی وسیلہ، گیشتر ڈغار، انسانی وسیلہ و ملک انا تہٹی گیشتر مارکیٹ تخوک آ ملک ءِ ہراڑے انفراسٹرکچر نا بھلو نظام اس ہم ارے۔ بنجائی وزیر صنعت و پیداوار غلام مرتضیٰ جتوئی پارے کہ پاکستان اٹی زرکاری کروک آ درملکی تے کٹیا ءِ پیشن دننگ و خراج آتیٹی آسراتی دوئی ءِ۔ اوپارے کہ ہڑتوم آ ملک آتیٹی اقتصادی و واپاری تعلقداری تا بھلو گمان اس ارے۔ وزیر پارے کہ پاکستان درملکی زرکارآتے کن خاص کر خصوصی اقتصادی زون تیٹی زرکاری نا شاندار وارخواہی پیش کیک۔ بنجائی وزیر پارے کہ پاکستان ساڑی ہی ٹی آٹو پالیسی اس درستی راستی کرفینے و ویتنام پاکستان اٹی آٹو بشخ اٹی زرکاری کرسا داپالیسی آن فائدہ ہرفنگ کیک۔
