وزیر مملکت اطلاعات و نشریات مریم اورنگزیب نا بیان

عاشورہ محرم نا پرامن اڈتننگ آ سیکورٹی فورس آتا کارکڑد ستاء کڑزک
اسلام آباد۔ 02اکتوبر (اے پی پی) وزیر مملکت اطلاعات و نشریات مریم اورنگزیب عاشورہ محرم نا پرامن اڈتننگ آ سیکورٹی فورس آتا کارکڑد نا ستاءِ کرینے و دارداٹ صوبائی حکومت آتا گچین بست و بند و کانود نافذ کروک آ ادارہ غاتے خراج تحسین پیش کرینے۔ یک شنبے نادے جاری اسہ بیان اسے ٹی او پارے کہ محرم الحرام نا وخت آ پولیس تون اوار سیکورٹی نا غٹ ادارہ غاک دے و نن خذمت انجام تسر ہراڑآاو تحسین نا حقدار ءُ۔ مریم اورنگزیب پارے کہ امن و ایمنی نا چرجوئی ٹی عزاردارن و شاری تا کمکاری ہم مثالی مس۔ اوپارے کہ تین پہ تینی سیوت، سخاو کمکاری اٹ ہرمشکل نا مون ءِ توننگ مریک۔ وزیر مملکت پارے کہ عاشورہ غان مست دہشت گردی نا ڈٹ ءِ بے سہب جوڑ کننگ سیکورٹی آپریٹس آتا شاندارسرسہبی و لائخی نا ثبوت ءِ ، قومی جوزہ، اخلاص و ہوشمندی اٹ خذمت انجام تننگ آ مچ آ قوم سیکورٹی ادارہ غاتے خراج تحسین پیش کیک۔ اوپارے کہ دہشت گردو ملک دشمن آتا چمب آتے بے سہب جوڑ کننگ کن سیکورٹی ادارہ و الس نا کمک المی ءِ۔ اوپارے کہ مچ آ قوم سیوت وسخا نا عظیم درشانی ءِ کرے و اہل بیت اتون مابت و امام عالی مقام نا عظیم قربانی تے شاندار وڑاٹ خراج عقیدت پیش کریر۔