گوادر نا شاری تے 5ملین گیلن دیر ہردے فراوان کننگ کن اسہ پلانٹ اس جوڑ جاڑ کننگک، احسن اقبال

اسلام آباد۔ 02اکتوبر (اے پی پی) بنجائی وزیر داخلہ ، ڈٹ بندی ، شونداری و اصلاحات احسن اقبال پارینے کہ گوادر نا شاری تے 5ملین گیلن دیر ہردے فروان کننگ کن سورانگا دیر ءِ ہنین کننگ نا اسہ پلانٹ اس جوڑ جاڑ کننگک۔ دااہم انگا ڈٹ انا منظوری ءِ اسیجائی کوآرڈینیشن کمیٹی نا بروک آ دیوان اٹی ہلنگک۔ ’’اے پی پی‘‘ تون ہیت وگپ اٹی بنجائی وزیر پارے کہ گوادر سٹی ٹی 300 میگاواٹ کولاآن بجلی دوئی کننگ نا اسہ پلانٹ اس ہم خلنگ انگ ءِ ہرااینخو نا سال کاریم نا بناءِ کیک ہراڑآن نئے بیرہ گوادر شار انا گرج آک پورو مریرہ بلکن ودکی بجلی بلوچستان نا ایلو علاقہ غاتے ہم فراوان کننگ مریک۔ بنجائی وزیر پارے کہ گوادر سٹی و بلوچستان نا ایلو علاقہ غاتے و پلانٹ تون گنڈنگ کن بجلی نا ٹرانسمیشن لین ہم نصب کننگ انگ ءِ۔ بنجائی وزیر گوادر ءِ چین پاکستان اقتصادی راہداری نا گیٹ وے گوندسا پارے کہ حکومت نا کنڈآن انفراسڑکچر نا شونداری کن اولیکو مرحلہ نا بناء آن پد ایکسپریس وے ، بندر گاہ ءِ ملفنگ کن جوڑ جاڑ کننگ انگ ءِ ہرا پوروی نا ایسری مرحلہ غاتیٹی ءِ۔ اوپارے کہ گوادر انٹرنیشنل بالی پٹ انا جوڑ جاڑناکاریم اینخو نا سال بناء کننگ نا گمان ءِ دا چرجوئی ٹی چین نا اسہ ٹیم اس زوت پاکستان نا دورہ ءِ کیک ہرا ڈیزائننگ نا جاچ ءِ ہلیک۔ اوپارے کہ گوادر یونیورسٹی ءِ اڈتننگانے تانکہ ہموجاگہ نا ورناتے بڑزکو تعلیم تننگ مرے وخت اس کہ ووکیشنل ٹریننگ سینٹر مہالو آن جوڑ جاڑ کننگانے ہراڑے ہندی ورناتے فنی تربیت فراوان کننگ انگ ءِ۔ اوپارے کہ پاکستان دہشت گردی ءِ شکست تننگ اٹی اہم سرسہبی دوئی کرینے۔ حکومتی کوشست آتا سوب امن و ایمنی نا حالیت آک گچین مننگ ءُ۔ سی پیک نا ڈٹ آتے کن 15ہزار سیکورٹی کارندہ غاتیا تالان فورس اس جوڑ کننگانے۔ بنجائی وزیر پارے کہ سی پیک پاک چین تعلقداری تے سوگو پارٹنر شپ اٹی بدل کرینے۔ سی پیک علاقائی معیشت آتے ضم کننگ نا پلیٹ فارم اس مہیا کیک ۔ داڑآن ارب آ بندغ آتا زند اٹی شونہالی بریک۔