مسکوئی وزیراعظم نواز شریف نا احتساب عدالت اٹی پیشی، ڈوہ بیٹ مننگ کتو، عدم پیشی آ حسن نواز، حسین نواز، کیپٹن (ر) محمد صفدر نا ناقابل ضمانت ، مریم نواز نا قابل وارنٹ دزگیری جاری، کیس انا بروک آ سماعت 9 اکتوبر اسکان ملتوی، حسن، حسین، مریم و کیپٹن(ر) صفدر پیش متو س تو اوفتا کیس ءِ جتا کرسا نواز شریف آ ڈوہ بیٹ کننگک،

نواز شریف نا حاضری آن استثنیٰ نا درخواست آ فیصلہ ہم بروک آ سماعت آ کننگک، عدالت
اسلام آباد۔ 02اکتوبر (اے پی پی) مسکوہی وزیراعظم محمد نواز شریف آ دوشنبے نادے احتساب عدالت اٹی پیشی نا وخت آ اونا برخلاف ڈوہ بیٹ مننگ کتو، عدم پیشی آ حسن نواز، حسین نواز، کیپٹن(ر) محمد صفدرنا نا قابل ضمانت وخت اس کہ مریم نواز نا قابل وارنٹ دزگیری جاری کننگا، کیس انا بروک آ سماعت 9 اکتوبر اسکان ملتوی کننگا۔ دادے حسن نواز، حسین نواز ، مریم نوازو کیپٹن (ر) محمد صفدر پیش متوس تو اوفتا کیس ءِ جتا کرسا نواز شریف آ ڈوہ بیٹ کننگک۔ دوشنبے نادے احتساب عدالت نا جج محمد بشیر نیب ریفرنس آتا سماعت ءِ کرے۔ داوخت آ نواز شریف نا وکیل خواجہ حارث پارے کہ مسکوہی وزیراعظم نا اُرائی کلثوم نواز بھاز بیمار ءِ و اوناچناک تینا لمہ نا درمان نا سوب لندن اٹی ءُ، بروک آ سماعت آ او عدالت اٹی پیش مریرہ ہنداخاطران عدالت آن خواست ءِ کہ اوفتا ناقابل ضمانت وارنٹ دزگیری ءِ جاری کننگپ و اوفتے پین وخت تننگے۔ نیب انا وکیل نواز شریف نا وکیل نا موقف نا مخالفت ءِ کرسا پارے کہ نواز شریف نا چناتے سمن ملاسس و عدالتی پرمان نا باوجود او عدالت اٹی پیش متوس ہنداخاطران اوفتے اشتہاری گوندنگے واوفتا ناقابل ضمانت وارنٹ دزگیری جاری کننگے۔ احتساب عدالت نواز شریف نا وکیل خواجہ حارث نا عدالتی پیشی نا یخین دہانی آ حسن، حسین وکیپٹن (ر) محمد صفدر نا ناقابل ضمانت وخت اس کہ مریم نواز نا قابل ضمانت وارنٹ دزگیری جاری کرے و بروک آ سماعت ءِ 9 اکتوبر اسکان ملتوی کرے۔ نواز شریف نا حاضری آن استثنیٰ نا درخواست آ فیصلہ ہم بروک آ سماعت آ کننگک۔