بری فوج انا سروک جنرل قمر جاوید باجوہ نا کابل اٹی اوغانستان نا صدر اشرف غنی تون اوڑدہی

راولپنڈی۔ 02 اکتوبر (اے پی پی) بری فوج انا سروک جنرل قمر جاوید باجوہ کابل اٹی اوغانستان نا صدر اشرف غنی تون اوڑدہی کرے ہراٹی ہڑتوم آ کنڈآتا اسیجائی معاملہ غاتیا سجفنگا۔ پاک فوج انا شعبہ تعلقات عامہ (آئی ایس پی آر) نا رداٹ بری فوج اناسروک جنرل قمر جاوید باجوہ کابل آ سرمس تواوغان آرمی چیف اودے بخیر کرے۔ پاک فوج انا سروک جنرل قمر جاوید باجوہ ءِ گارڈ آف آنر ہم پیش کننگا۔ آرمی چیف جنرل قمر جاوید باجوہ اوغانستان نا صدر اشرف غنی تون مون پہ مون و ڈل انا کہول آ اوڑدہی کرے۔ اوغانستان نا صدر اشرف غنی داوخت آ پارے کہ پاکستان و اوغانستان سنگت ملک ءُ و ہڑتوم آ تے پائیدار امن و سوگوی کن اواری اٹ مون آ ہنوئی مریک۔ ہڑتوم آ ملک آک ڈیہہ نا ساڑی آ سیکورٹی حالیت و ہڑتوم آ کنڈاناتعلقداری تا حالیت آتا جاچ ءِ ہلکر وخت اس کہ پاک اوغان تعلقداری نا غٹ پلو آتیا خیال آتا درشانی ءِ کننگا۔ مریس وختی امن نا بابت اسیجائی خلیس آتا برخلاف کمک ، انسداد دہشت گردی و غیر ریاستی عنصر آتا بابت انٹیلی جنس شیئرنگ ، واپار و السی رابطہ غاتا بابت معاملہ غاتیا خیال آتا درشانی ءِ کننگا۔ آرمی چیف جنرل قمر جاوید باجوہ اوغانستان نا سیکورٹی فورس آتا دہشت گردی نا برخلاف جنگ اٹی اسیجائی مفاد آتا دوئی کننگ کن تربیت و کاریم نا کچ ءِ ودفنگ کن پاکستان نا کنڈآن پورو کمکاری نا پیش کش کرے۔ ہڑتوم آ کنڈآک سیاسی عمل نا کمک اٹ پرامن چاگڑد، علاقائی سوگوی کن فریم ورک آامنا کریر۔ ڈیہہ ٹی امن و سوگوی کن غلط فہمی تے کم کننگ، تنکی نا حالیت آتا چٹفنگ کن ہڑتوم آ کنڈآتا کمکاری ءِ ودفنگ کن چندی کہول آتیا باقاعدگی اٹ مذاکرات و ہیت وگپ آ امنا کننگا۔ اوغانستان نا دوئم نائب صدر ، اول ڈپٹی چیف ایگزیکٹو آفیسر، دوئم ڈپٹی چیف ایگزیکٹو آفیسر، نیشنل سیکورٹی ایڈوائزر، این ڈی ایس ناچیف، وزیر دفاع، وزیر داخلہ، اوغان سفیر و اوغان آرمی چیف ہم دیوان اٹی ساڑی ئسر وخت اس کہ آرمی چیف جنرل قمر جاوید باجوہ تون اوار ڈل اٹی سیکرٹری خارجہ امور، ڈی جی آئی ایس آئی و پاکستان نا سفیر اوار ئسر۔