اسلام آباد۔ 29 ستمبر (اے پی پی) مچ آ ملک اٹی نادرانا کمک اٹ غیر رجسٹرڈ اوغان باہوٹ آتا رجسٹریشن نا عمل جاری ءِ و داوخت اسکان اسہ لکھ 46ہزار اوغان باہوٹ آتے رجسٹرڈ کننگانے۔ جمعہ نا دے وزارت سیفران نا ذیلی ادارہ اوغان کمشنر یٹ نا ڈائریکٹر فہمیدہ ’’اے پی پی‘‘ ءِ پارے کہ حکومت پاکستان ملک اٹی رہینگوک آ غیر رجسٹرڈ اوغان باہوٹ آتا رجسٹریشن نا فیصلہ ءِ کریسس ہرانا رداٹ وزارت سیفران نادرانا کمک اٹ غیر رجسٹرڈ اوغان باہوٹ آتا رجسٹریشن نا عمل ءِ اینخو سال اگست اٹی بناء کرے ہرانا رداٹ داوخت اسکان اسہ لکھ 46ہزار غیر رجسٹرڈ اوغان باہوٹ آتے رجسٹرڈ کننگانے۔ اوپارے کہ رجسٹریشن نا عمل اٹی اوغانستان نا سفارت خانہ نا کمامدارآک ہم اوار ءُ ہراتینا شاری تا رجسٹریشن نا وخت آ درستی راستی ءِ کیرہ اوکان پد باہوٹ آتے رجسٹرڈ کننگ انگ ءِ۔ اوپارے کہ پاکستان اٹی غیر رجسٹرڈ باہوٹ آتا رجسٹریشن نا عمل دسمبر اسکان پورو کننگک۔ اوپارے کہ ہمو اوغان باہوٹ آتے مطلع کننگک کہ ہراک داوخت اسکان تینا رجسٹریشن ءِ کرفتنو او دمدستی وڑاٹ نادرانا رجسٹریشن بنجاتیٹی ہنسا تینے و تینا خاہوت ءِ رجسٹرڈ کرفر۔ اوپارے کہ ملک اٹی رہینگوک آ غیر رجسٹرڈ اوغان باہوٹ آتا رجسٹریشن نا داآخریکو موقع ءِ داکان پد غیر رجسٹرڈ اوغان باہوٹ آتے رجسٹرڈ کننگپک۔ یات سلے کہ غیر رجسٹرڈ اوغان باہوٹ آتے رجسٹریشن کننگ کن مچ آ ملک اٹی 22بنجاکاریم کننگ ءُ۔
