صوبائی حکومت بے روزگار ورناتے روزگار نا فراوانی کن عملی گام گیج کننگ ءِ، بلوچستان نا الس نا رنگ و نسل آن ایڑتر خذمت ءِ کینہ، سینیٹر آغا شاہ زیب درانی
اسلام آباد۔ 28 ستمبر (اے پی پی) پاکستان مسلم لیگ (ن) نا سینئر راہشون و سینیٹر آغاشاہ زیب خان درانی پارینے کہ پاک چین اقتصادی راہداری ڈٹ گیم چینجر نا حیثیت تخک ہراڑآن ڈیہہ ٹی معاشی سرجزآتے پبی وڑاٹ مون آ دننگ مریک، حکومت نا کوشست آتا سوب پاک چین اقتصادی راہداری ڈٹ آن پاکستان اٹی بے روزگاری نا خاتمہ و معاشی سرجز آک ودرہ ، ارب آڈالر نا زرکاری آن پاکستان و چین نا نیام اٹ معاشی تعلقداریک پین سوگو مریرہ ، بے شک پاک چین اقتصادی راہداری ڈٹ مسلم لیگ (ن) نا حکومت نا اسہ تاریخی ءُ کارنامہ اسے ہرانا کمک اٹ پاکستانی معیشت ءِ سوگو جوڑ کننگ تون اوار اوار ملک آن بے روزگاری ہم چٹک انتئے کہ بلوچستان نا شونداری پاکستان نا شونداری نا ضامن ءِ۔ داخیال آتا درشانی ءِ او پنچ شنبے نادے ’’اے پی پی‘‘ تون خصوصی ہیت وگپ کرسا پارے۔ اوپارے کہ پاک چین اقتصادی راہداری ڈٹ آن ڈیہہ تون اوار اوار دنیا نا گیشتر ملک آتے معاشی فائدہ دوئی کننگ مریک۔ پاکستان نامعیشت ءِ سوگو کننگ کن مسلم لیگ (ن) نا حکومت نا داڈٹ تاریخ ساز و دورس نتیجہ غاتا حامل مریک۔ اوپارے کہ بلوچستان نا الس نا رنگ و نسل آن ایڑتر خذمت ءِ کینہءِ، ساڑی آ دورِ حکومت اٹ بلوچستان اٹ اخس کہ شونداری کاریم مننگ ءِ مستین اٹی اوفتا ہچ ءُ مثال اس ملیپک، وزیراعلیٰ بلوچستان نواب ثناء اللہ خان زہری نا سروکی ٹی صوبہ شونداری نا کسرآروان ءِ ، سی پیک آن ڈیہہ ٹی شونہالی نا پوسکن آ سفر نا بناء مریک، اقتصادی راہداری ڈٹ ڈیہہ نا تقدیر ءِ بدلیفک و روزگار نا پوسکن ءُ کسر ملنگک ، بے روزگارورناتے روزگار نا فراوانی کن صوبائی حکومت گام گیج چست کننگ ءِ، سینیٹر آغاشاہ زیب درانی پارے کہ علاقہ نا شونداری و شونہالی و الس نا خذمت ہی ننا مشن ءِ۔ اوپارے کہ بلوچستان نا بے روزگارورناتے روزگار فراوان کرسا ورناتیٹی مایوسی ءِ مدام چٹفنہ، ساڑی حکومت تعلیمی نظام اٹی اصلاحات آتون اوار ایلو بشخ آتیٹی آب ءِ گچین جوڑ کننگ کن جنگی بنداو تیا گام گیج چست کننگ ءِ و ننا کوشست ءِ کہ بلوچستان نا شونداری و شونہالی کن غٹ وسیلہ غاتے سنجیدگی اتون کاریم اٹ اتنگے۔ اوپارے کہ 2018 ء نا گچین کاری تیٹی کارکڑد نا بنداو آ بشخ ہلینہ و دا گچین کاری تے ہم پاکستان مسلم لیگ (ن) بھلو گیشتری اسے اٹ کٹک۔ اوپارے کہ مسلم لیگ (ن) 2013ء نا گچین کاری تیٹی قوم اتون وعدہ کریسس کہ ملک انا شونداری و شونہالی، کشت وکشار و صنعت نا مون آ دننگ کن بجلی نا کمتی ءِ پورو کرسا ملک ءِ روشن کینہ۔ شونداری ڈٹ و السی شرحالی نا گام گیج آتیان الس نا تغ ءِ حقی تعبیر اس ملانے، اسہ سوج اسے نا ورندی ٹی اوپارے کہ وزیراعلیٰ بلوچستان نواب ثنا ء اللہ خان زہری خلقت ءِ مون تروک ویل آتا چٹفنگ کن عملی گام گیج کننگ ءِ ، تعلیم ، جان جوڑی ، کنوئی ءُ صاف دیر، مواصلات آتون اوار چندی شونداری کاریم تا جال اس شاغانے، غٹ ڈٹ آتیٹی اجتماعیت ءِ مون آ درینے۔ اوپارے کہ نناسیاست نا محور الس نا بے پرخ خذمت ءِ پاکستان مسلم لیگ ن مدام الس نا خذمت ءِ تینا منشور سمجھانے و خذمت کرسا کیک۔ بلوچستان اٹی امن و ایمنی نا حالیت آتیٹی گچینی بسنے وخت اس کہ دہشت گردی نا واقعہ غاتیٹی نمان کمتی بسنے۔ اوپارے کہ وزیراعلیٰ بلوچستا ن نواب ثناء اللہ خان زہری نا سروکی ٹی مچ آ بلوچستان اٹ شونداری ڈٹ آتا جال اس شاغنگانے۔ بلوچستان اٹی نہری نظام نا مون آ دننگ و خشک سالی نا چٹفنگ کن وزیراعلیٰ نا جندی کوشست آتیان کچھی کینال کون آ عظیم انگا ڈٹ ایسری اسکان سرمسنے و انشاء اللہ زوت اسے اٹ کچھی کینال نا بروک آ فیز انا بناءِ کرسا نصیر آباد نا خشک انگا ڈغار ءِ گرین بیلٹ اٹ بدل مریک و صوبہ آن پسماندگی و دیر انا کاختی نا چٹفنگ ممکن مریک۔
