اسلام آباد۔ 28 ستمبر (اے پی پی) چین پاکستان اقتصادی راہداری ڈٹ(سی پیک ) نا رداٹ خیبر پختونخوا نا ضلع نوشہرہ ٹی واقع رشکئی اقتصادی زون دسمبر 2017ء ٹی فعال مریک، رشکئی اقتصادی زون (ایم ون نوشہرہ) کن 2000 ایکڑ ڈغار دوئی کننگانے و صنعتی بستی تااڈتننگ کن گام گیج آتا چرجوئی برجاءِ۔ وزارت ڈٹ بندی ٹی اڈ ہلوک سی پیک سیکرٹریٹ نا کمامدارآک اے پی پی ءِ پاریر کہ اقتصادی زون اٹی میوہ و کنوئی آ گڑاتا پیکجنگ، ٹیکسٹائل سٹچنگ ونٹینگ و ایلو تعلقدار صنعت آتا اڈ تننگ و اوفتے کن آسراتی آ چکار کننگک۔ رشکئی اقتصادی زون نا علاقائی و جغرافیائی اہمیت ءِ مون آ تخسا اوپاریر کہ داصنعتی بستی آن بالی پٹ نا فاصلہ 65کلومیٹر، ڈرائی پورٹ 65کلومیٹر، ریلوے اسٹیشن 25 کلومیٹر، سٹی سینٹر 15کلومیٹر ، ہائی وے 5کلومیٹر وموٹروے بالکل گنڈوک ءِ۔ اسہ سوج اسے آ اوفتا پاننگ ئس کہ دا علاقہ ٹی صنعتی بستی نا اڈتننگ نا سلاہ صوبائی حکومت نا کنڈآن بسوسس و داٹی بنجائی حکومت نا کنڈآن ہچ ءُ مداخلت اس کننگ تنے۔ کمامدارآتا رداٹ سی پیک نا ارٹ میکو مرحلہ نا رداٹ پاکستان اٹی چین نا کمک اٹ صنعتی انقلاب اس بریک، دامرحلہ ٹی ملک انا ہر چارآ صوبہ، گلگت بلتستان، فاٹا وآزاد کشمیر اٹی جم وڑاٹ 9 صنعتی زون جوڑ کننگک۔
