یوم عاشورنا وخت آ راولپنڈی اسلام آباد تون اوار مچ آ ملک اٹی امن و ایمنی نا حالیت آتے برقرار تخنگ کن موثر گام گیج نا فیصلہ

اسلام آباد۔ 28 ستمبر (اے پی پی) محرم الحرام نامقدس انگا دے خاص کر یوم عاشور نا وخت آ بنجائی دارالحکومت و جاڑ انگا شار راولپنڈی تون اوار مچ آ ملک اٹی امن و ایمنی نا حالیت آتے برقرار تخنگ کن گچین گام گیج کننگ نا فیصلہ کننگانے وخت اس کہ بنجائی و صوبائی سیکورٹی ادارہ غاتے ہروڑنا حالیت آتون مون تننگ کن چسپان سلنگ، غٹ مکاتب فکر انا عالم دین و مشائخ آتا دیوان اٹی منظور مروک آ ضابطہ اخلاق آ سختی اٹ عملدرآمد کرفنگ نا پارت کننگانے۔ نہہ می و دہ می محرم الحرام نا وخت آ خاص کر و ایلو دے تیٹی لس مجلس عزاء و یوم عاشور نا جلوس آتا سخت ترین رکھ انا بابت بنجائی و صوبائی سیکورٹی ادارہ غاک حکمت عمل اس جوڑ کرینو ہرانا رداٹ جلوس آتا پترینگوک آ کسر تیا پوسکن ءُ ازباب و واک تھرو گیٹ انا کمک اٹ سخت سکریننگ کننگک۔ جلوس نا کسرتا ہم حساس ازباب آتا کمک اٹ چیکنگ آن پد گدرینگ انگ نا موکل تننگک۔ جلوس آتا بناء و ایسری نا بابت باقاعدہ ٹائم فریم اس جوڑ کننگانے۔ نن نیمہ اسکان جلوس آتے جاری تخنگ نا موکل تفننگک۔ بنجائی و صوبائی انتظامیہ ءِ عالم دین و مشائخ نا اسیجائی دیوان اٹی منظور مروک آ اسیجائی پڑو آتیا سختی اٹ عملدرآمد کرفنگ نا ہم پارت کننگانے ہراٹی پاننگانے کہ چندی مکاتب فکر انا عالم دینک داہیت آ امنا کرینو کہ مسلک اسے نا برخلاف خارانگیز تقریر و مواد آتا شینک انا مرتکب بندغ آتا برخلاف سخت کارروائی کننگے و امن و ایمنی نا حالیت آتے برقرار تخنگ کن ہروڑنا گام گیج چست کننگے۔