اسلام آباد۔ 28 ستمبر (اے پی پی) بنجاء نا بست و بندی قبائلی علاقہ جاٹ(فاٹا) ٹی آپریشن ضرب عضب آن زہمی مروک آ 49 ہزار 303 اُراتا سروے ءِ پورو کننگانے، پورووڑاٹ بھس مروک آ اُرانا معاوضہ چارلکھ وخت اس کہ جزوی وڑاٹ زہمی مروک آ ہند آتا معاوضہ اسہ لکھ شست ہزار روپئی تننگ انگ ءِ۔ فاٹا نا پوسکن جوڑ جاڑ و بحالی نا پروگرام منیجر شکیل انجم پنچ شنبے نادے اے پی پی تون ہیت وگپ کرسا پارے کہ بنجاء نا بست و بندی قبائلی علاقہ جاٹ اٹی دہشت گرد آتا برخلاف آپریشن ضرب عضب اٹ زہمی مروک آ ہند آتا سروے نا عمل برجاءِ ولے داوخت اسکان 49ہزار 303 اُراتا سروے ءِ پورو کننگانے۔ ہرافتے اِرا کیٹیگری ٹی بشخ وپانٹ کننگانے ہرافتے ٹی اے کیٹیگری پورووڑاٹ بھس وخت اس کہ کیٹیگری بی جزوی وڑاٹ زہمی مروک آ ہند آتے کن کاریم اٹ اتنگ انگ ءِ۔ اوپارے کہ سروے نا عمل اٹ پنچ باسکی ٹیم کاریم کننگ ءُ ہراٹی اسہ کارندہ اس سیکورٹی فورس، ارٹ میکو محکمہ مال، مسٹ میکو ضلعی انتظامیہ، چارمیکو باسک محکمہ تعلیم وخت اس کہ پنچ میکو باسک ہندی علاقہ نا نمائندہ اوار ءِ ہرا سروے کرسا تینا رپورٹ ءِ بحالی و پوسکن جوڑ جاڑ نا محکمہ نا حوالہ کیک۔ شکیل انجم پارے کہ سروے نا عمل آن پد عارضی وڑاٹ بے اُرا بندغ آتا مہشون ءِ فاٹا سیکرٹریٹ ءِ گدریفنگک اوکان پد ننے بے اُرا بندغ آتا معاوضہ غاتا فراوانی مریک ہرا بے اُرا بندغ آتیٹی بشخخ وپانٹ کننگ انگ ءُ۔
