اوغانستان اٹ امن و سیکورٹی کن زمواری ہلنگ کپنہ، ننے ہمو کننگ کن پاننگ انگ ءِ ہرا دے دنیا نا بے کچ واکدار و امیر ملک آک کننگ کتنو، اوغان ویل انا عسکری ایسری بے سہب مسنے
نیویارک ۔ 27 ستمبر (اے پی پی) وزیر خارجہ خواجہ محمد آصف پارینے کہ پاکستان اوغانستان نا ویل انا پرامن ایسری کن آسراتی مہیا کننگ و امریکہ تون اواری اٹ اوغان سیم آ گچین مینجمنٹ کن تیار ءِ تانکہ دہشت گردآتانیام تمنگ ءِ توننگ مرے۔ او تدوک آ دے ایشیاسوسائٹی آن تران کریکہ۔ وزیر خارجہ دا دے تیٹی اقوام متحدہ نا جنرل اسمبلی نا 72می دیوان اٹ شرکت کن نیویارک اٹی ءِ۔ اوغانستان نا غٹ ناجوڑی تے کن پاکستان ءِ قربان کننگ درست اف۔ اوپارے کہ پاکستان مستین اٹی اوغانستان نا ویل انا سیاسی ایسری کن ہروڑآسراتی مہیا کرینے وخت اس کہ پاکستان دایخین دہانی ءِ کرفینے کہ اونا گل زمین ءِ اسہ ملک اسے نا ہم برخلاف کاریم اٹ اتنگ کن ہلیپنہ۔ تینا بنائی ہیت آتیٹی خواجہ آصف پاکستان نا بھارت تون تعلقداری، کشمیر نا ویل ، انسداد دہشت گردی کن چست کروک گام گیج و ملک انا اقتصادی شونداری نا احاطہ ءِ کرے۔ اوایشیاسوسائٹی نا ایگزیکٹو نائب صدر ٹام نگورسکی ءِ بخیراٹ پارے۔ پروگرام نا میزبانی ءِ کولمبیا یونیورسٹی ناجرنلزم نا استاد پنی آ امریکی صحافی سٹیو کول کرے۔ خواجہ آصف پارے کہ پاکستان ہر ملک آن زیات اوغانستان اٹ امن و سوگوی نا بحالی نا خواہش مند ءِ۔ اونا سوب اودے اوغانستان تون سیم آ نزوری و جھیڑہ غاتا مون تروکی ءِ۔ ننا دا پبی خواہش ءِ کہ اوغانستان اٹ جاری مریس جنگ تینا ایسری آ سرمرے۔ نن دا مسخت کن است انا ھب اٹ پورو کمک و دارداٹ ہروڑنا کمک کن تیار اُن۔ نن اوغانستان اٹ امن و سوگوی خوانہ۔ اوپارے کہ داڑے پاکستان نا دنگ بھاز صفا ءِ کہ اودے انت کروئی ءِ۔ نن اوغانستان اٹ امن و سیکورٹی کن زمواری ہلنگ کپنہ۔ ننے ہمو کننگ کن پاننگ انگ ءِ ہر ادنیا نا بے کچ واکدار و امیر ملک آک کننگ کتنو۔ اوپارے کہ گچین بارڈر مینجمنٹ ہی اصل کنجی ءِ۔ اوغانستان نا کنڈآن سیم آ پین کاریم کننگ نا گرج ءِ ہراڑے دہشت گرد عنصر آک تینا آسان رکھوک ہندجاٹ پٹانو۔ اوپارے کہ دا ویل انا عسکری ایسری نادانی اسے و دا بے سہب مسنے۔ اوپارے کہ نن اوغان بارڈر نا گچین مینجمنٹ کن امریکہ تون اواری اٹ کاریم کننگ نا خواہش مند اُن۔ داڑتون اوار اوار امن و عمل اٹ آسراتی ہم تننگ کینہ۔ اوپارے کہ داعش کون آ پوسکن آ مون آ بروک آ چیلنج آتون مون تننگ کن ہم خیال ملک آتیٹی زیات کمک و سوگو شریداری اتون اوار اوار انتہاپسندی نا دا تاریک واک آتا برخلاف یکجا مرسا جنگ کروئی مریک۔ اسہ سوج اسے نا ورندی ٹی وزیر خارجہ پارے کہ پاکستان و بھارت ءِ مذاکرات نا میز آ اتنگ کن پوسکن ءُ گام گیج نا گرج ءِ ہراڑے دہائی تیا متکن کشمیر نا ویل ہراہڑتوم آ ملک آتا نیام اٹ بے چیٹی نا بنداوی سوب ءِ تون اوار ویل آتیا ہیت وگپ مرے۔ اوپارے کہ ہراوخت اسکان بھارت تون تعلقداریک جوان مفسہ ہمسایہ غاتیٹی امن مننگ کپک۔ پاکستان بھارت تون تعلقداری تے معمول آ اتنگ و غٹ جھیڑہ غاتے ہیت وگپ نا کمک اٹ ایسر کننگ کن کیہی وار رابطہ کرے ولے بھارت نا کنڈآن ہمووڑاٹ ورندی تفننگ انگ ءِ ۔ ورکنگ باؤنڈری و کشمیر اٹی لین آف کنٹرول سیز فائر نا بلااشتعال خلاف ورزی، مقبوضہ کشمیر اٹ کودک شاری تا برخلاف واک انا کاریم اٹ اتنگ ، اقلیت خاص کر مسلمان تے بھارت اٹ ہراساں کننگ نا توننگ و سیاسی بیان بیازی ءِ ودفنگ کون آ گام گیج آتا چٹفنگ اسکان سویلی ایشیاٹی امن، مفاہمت و مذاکرات مننگ کپک۔ اوپارے کہ بھارت کشمیر نا ویل ءِ گوجالنگ کپک و نئے او کشمیر نا روا حق خودارادیت کن جہد ءِ دہشت گردی تون گنڈنگ کیک۔ اوپارے کہ پاکستان غٹ جھیڑہ غاتا پرامن ایسری و الس ءِ سوگو و پرامن چاگڑد اس تننگ کن بھارت تون کاریم کننگ آ تیار ءِ تانکہ ہڑتوم آ ملک آتا الس شونداری و شونہالی نا خواہش ءِ حقیقت اٹ بدلیفنگ کے۔ اوپارے کہ پاکستان بھلو کچ اسے آ علاقائی سیوت و رابطہ غاتے کن کاریم کننگ ءِ۔ پاک چین اقتصادی راہداری ڈٹ دا پالیسی نا بنداوی عنصر ءِ۔ دا ڈٹ ارب آ ڈالر نا ءِ ہراٹی انفراسٹرکچر ، توانائی ، گوادر بندرگاہ و صنعتی کمک اوار ءِ۔ داکان بیدس ایلو علاقائی ڈٹ آتیٹی تاپی، کاسا1000 و پاکستان اوغانستان و تاجکستان نا نیام اٹ واپاری شریداری ءِ گچین جوڑ کننگ اوار ءِ۔ اوپارے کہ دا دائرہ عمل اٹ امریکہ ننا اہم انگا شریدار ءِ و مریک۔ اوپارے کہ پاکستان و امریکہ نا نیام اٹ دہشت گردی نا برخلاف جنگ و پرتشدد انتہاپسند عنصر بشمول آئی ایس آئی ایل نا تالانی ءِ توننگ کن اواری اٹ کاریم کننگ بھاز زیات اتفاق ءِ ہنداوڑ اوغانستان اٹ امن و سوگوی ننا تین پہ تینی فائدہ ٹی ءِ۔ اوپارے کہ اسہ سوگو و رکھوک ڈیہہ اس نئے بیرہ امریکہ بلکن ننا فائدہ ٹی ہم ارے۔ اوپارے کہ ننا موقف ءِ کہ ہراوخت آ کہ پاکستان و امریکہ اواری اٹ کاریم کرینو ہڑتوم آ ملک آک فائدہ ٹی مسنو۔ نن امریکہ نا کنڈآن چندی بشخ آتیٹی پاکستان نا کمک ءِ کننگ آ اونا منت وار اُن۔ اوپارے کہ اینو پاکستان نا اقتصادی شونداری نا مچ آ دنیا ٹی اعتراف ءِ کننگ انگ ءِ۔ بلوم برگ کون آ بھلا جہانی ادارہ غاک پاکستان نا رینکنگ اٹی گچینی ءِ ظاہر کننگ ءُ۔ اُرائی و صنعتی بشخ آتے توانائی نا فراوانی نا بشخ اٹ نمان گچینی بسنے۔
