بنجائی وزارت جان جوڑی نا ترند انگا دوائی تا تیاری و اوفتا نرخ آتا تعین نا بارواٹ سلاہ ئی بنجائی پالیسی نا سرجم آتیان معلومداری کن صدر ءِ خصوصی بریفنگ
اسلام آباد۔ 27 ستمبر (اے پی پی) صدر مملکت ممنون حسین پارت کرینے کہ بھلا ناجوڑی تا گواچی ناجوڑآتا درمان کن دوائی تا بروخت و ہڑزآن فراوانی ءِ المی جوڑ کننگ کن ہروڑنا گام گیج کننگے تانکہ ملک اٹی جان جوڑی نا مسخت آتے دوئی کننگ مرے۔ صدر مملکت داہیت ءِ بنجائی وزارت جان جوڑی نا کنڈآن تروک آ اسہ خصوصی ءُ بریفنگ اسے نا وخت آ پارے ہراٹی اودے ترند انگا دوائی تا تیاری و نرخ آتا تعین نا بارواٹی سلاہ ئی بنجائی پالیسی نا سرجم آتیان معلومدار کننگا۔ داوخت آ بنجائی وزیر جان جوڑی سائرہ افضل تارڑ و ایلو بڑزکو کمامدارآک ہم ساڑی ئسر۔ صدر مملکت بریفنگ اٹی است خواہی ہلسا پارت کرے کہ پالیسی نا افادیت اٹ ودکی کن تعلقدار حلقہ غاتے ہم پت اٹ ہلنگے۔ صدر مملکت پاکستان اٹ تیار مروک آ دوائی تا معیارءِ پک کننگ کن ورلڈ ہیلتھ آرگنائزیشن نا منظور مروک فیڈرل ڈرگ سیکورٹی لیبارٹری نا زوت کاریمی مننگ آ زور شاغا تانکہ پاکستان اٹ تیار مروک آ دوائی تا برآمد آتیٹی ودکی مننگ کے۔ بنجائی وزیر جان جوڑی سائرہ افضل تارڑ داوخت آ پارے کہ المی کانودی مرحلہ غاتا پوروی آن پد زوت ہی بھلا مرض آتا درمان کن آرفن ڈرگز پالیسی نا نفاذ عمل اٹ بریک۔
