اسلام آباد۔ 27 ستمبر (اے پی پی) مسلم لیگ (ن) نا راہشون و وزیر مملکت کیڈ طارق فضل چوہدری پارینے کہ شرفدار آ عدالت ننا وکیل نا خواست ءِ بِننگ آن بیدس وزیر خزانہ اسحاق ڈار آ فرد جرم بیٹ کرینے۔ اسلام آباد احتساب عدالت نا پیشن میڈیا تون ہیت وگپ کرسا اوپارے کہ چارشنبے نا سہب احتسا ب عدالت کٹیا غان زیات میرات آتا نیب ریفرنس اٹی وزیر خزانہ اسحاق ڈار آ فردجرم بیٹ کرینے۔ طارق فضل چوہدری پارے کہ کیس انا سماعت آن مست ننا وکیل شرفدار آ عدالت آن خواست کریسس کہ نیب کانود نا رداٹ ہراتم بندغ اسے نا برخلاف فردجرم بیٹ کننگک تو داکان مست ہندا بندغ ءِ کم از کم 7 دے انا مہلت تننگک۔ مسلم لیگ (ن) نا راہشون پارے کہ ننا وکیل فرد جرم بیٹ کننگ آن مست عدالت ءِ دا بابت ہائی کورٹ، آزاد کشمیر سپریم کورٹ و سپریم کورٹ آف پاکستان نا ریفرنس آتے ہم پیش کرینے ہرافتارداٹ ریفرنس دائر مننگ آن پد 48 گھنٹہ نا تہٹی فرد جرم بیٹ کپننگ نا فیصلہ ساڑی ءِ۔ اوپارے کہ احتساب عدالت کیس انا سماعت کن 4اکتوبر نا تاریخ ءِ مقرر کرینے وخت اس کہ دادے آ اِرا گواہ ءِ ہم بٹنگ انگانے۔ اوپارے کہ مسلم لیگ (ن) نا سروکی و میاں محمد نواز شریف تون اوار ہراہراسنگت آتا برخلاف ریفرنس دائر کننگانے او غٹ عدالت آتا مون آ پیش مننگ ءُ۔ طارق فضل چوہدری پارے کہ مسلم لیگ (ن) کانود نا ہیت ءِ کپک بلکن عملی وڑاٹ ہم عدالت آتیٹی پیش مننگ ءِ۔
