اقوام متحدہ۔ 27 ستمبر (اے پی پی) میانمار اٹی روہنگیا مسلمان تا تنکی ءِ شرہ ٹی اتنگ کن اقوام متحدہ نا سلامتی کونسل نا دیوان (اینو) پنچ شنبے ناد ے مریک۔ العربیہ ٹی وی نا رداٹ ذرائع نا پاننگ ءِ کہ اقوام متحدہ نا سیکرٹری جنرل آنتونیو گوترس دیوان آن تران کیک۔ دادیوان ہفت ملک آتا خواست آ بٹنگ انگانے اوفتے ٹی امریکہ، فرانس،برطانیہ، مصر ، قازخستان ، سینیگال و سویڈن اوار ءُ۔ دا ملک آک آنتونیوگوترس آن خواست کریسر کہ گدرینگوک آ اسہ تُواسے آن میانمار نا دیکی ٹی رخائن صوبہ ٹی روہنگیا مسلمان تا برخلاف فوجی آپریشن نا بابت رپورٹ سلامتی کونسل اٹی پیش کننگے۔ میانمار نا فوج انا مسلمان اقلیت نا برخلاف کارروائی 4.2لکھ آن زیات بندغ آتے ہمسایہ ملک بنگلہ دیش نرنگ آ بیوس کریر وخت اس کہ اقوام متحدہ دادے نسلی تطہیر گوندانے۔ فرانسیسی صدر ایمانوئل ماکرآتا رداٹ دابیدادی واقعہ غاک اجتماعی نسل کشی نا کہول اسکان سرمسنو۔
