اسلام آباد۔ 26 ستمبر (اے پی پی) مسکوہی وزیراعظم محمد نواز شریف پارینے کہ فیصلہ غاتا ساکھ سلتو عدالت آتا ساکھ سلپک ، قومی تاریخ دُن انگا فیصلہ غاتیان پُر ءِ ہرافتا ذکر ءِ کرسا ندامت مریک ، وخت بسنے کہ70 سال انا متکن آ کینسر نا درمان اس تجویز کننگے، اگہ آئین پاکستان نا الس ءِ حکمرانی نا حق ایتک تو اودے امنا کننگے، قوم جی ٹی روڈ و پد اٹی این اے 120 نا الس دوٹوک و صفا فیصلہ اس تسنو، دُن ءُ فیصلہ برسا کیک۔ 2018ء ٹی ہم قوم اسہ ہندن ءُ عظیم ءُ فیصلہ اس ایتک ہرا مولوی تمیزالدین کیس کون آ فیصلہ غاتیامبار غٹ ءِ وہیفسا دیک، ای دروغ آ مبنی جوڑ کروک آ مقدمہ غاتون مون تننگ اُٹ، قوم انا مہرومابت کنا غٹ آن نہادی میرات ءِ، کہ مسلم لیگ (ن) نا تہٹی سیوت بروک آ گچین کاری ٹی ہم ننا سرسہبی نا ذریعہ جوڑ مریک، ای پاکستان نا شونداری و شونہالی نا سوغند ءِ ہرفینٹ و شونداری نا داسفر برجاسلک۔ سے شنبے نادے پنجاپ ہاؤس اٹی پریس کانفرنس آن تران کرسا مسکوہی وزیراعظم محمد نواز شریف پارے کہ کنے کنا اُرائی نا ناجوڑی نا سوب لندن آ ہنوئی تما، اونا ناجوڑی نانوعیت نما مون آ ٹی ءِ، ای پاکستانی قوم انا منت واری ءِ ہرفیوہ ہراک کنا اُرائی ءِ دعاکریر، داہیت کنا گمان اٹی ہم اَلوکہ کہ ای زیات دے وطن آن پیشن گدریفیوہ۔ اوپارے کہ ای مدام مقدمہ غاتون مون تسونٹ، داکنا ذات انا آخا، مچ آ قوم انا ویل ءِ، ای مشرف دور اٹی جہاز پی کے 786اٹ لندن آن پدی بسوسٹ ولے کنے ملک بدر کننگا۔ اوپارے کہ عدالت و کانود آن نرنگ ننا طریقہ اف، آئین و کانود نا پاسداری ننا طریقہ ءِ۔ اوپارے کہ ڈکٹیٹر نا مون آ جہد کریٹ، نابودی و جلاوطنی کاٹاٹ، ہائی جیکر مننگ نا ڈوہ اٹی ہم سزا کاٹانٹ ولے ڈکٹیٹر نا مون آ کاٹم ءِ شیف کتنوٹ۔ اوپارے کہ مسلم لیگ (ن) نا تہٹی سیوت بروک آ گچین کاری تیٹی ہم ننا سرسہبی نا ذریعہ جوڑ مریک، ای پاکستان نا شونداری و شونہالی نا سوغند ءِ ہرفینٹ و شونداری نا داسفر برجاسلک۔
