اسلام آباد۔ 26ستمبر (اے پی پی) اسپیکر قومی اسمبلی سردار ایاز صادق پارینے کہ پاکستان ڈیہہ ٹی دہشت گردی نا چٹفنگ و دامسخت نا دوئی کن اسہ ایلو تون رابطہ غاتے مون آ دننگ آ خصوصی چکار کننگ ءِ، پاکستان نا قومی اسمبلی اینخو نا سال دسمبر اٹی اسہ کانفرنس اس اڈترفنگ ءِ ہراٹی چین، روس، ترکی، ایران و اوغانستان نا اسپیکر شرکت کیرہ۔ اوداخیال آتا درشانی ءِ بلوچستان نا صوبائی اسمبلی نا اسپیکر راحیلہ حمید خان درانی نا سروکی ٹی صوبائی اسمبلی نا ڈل اتون کرے ہراک سے شنبے نادے پارلیمنٹ ہاؤس اٹی اوڑتون اوڑدہی کریر۔ اوپارے کہ دہشت گردی و انتہاء پسندی اسہ جہانی ءُ ویل اسے و داوخت داناسور ءِ چٹفنگ کن اسیجائی جہد نا جوان ءُ وخت اسے۔ اوپارے کہ بلوچستان ہم دہشت گردی نا گواچی ءِ و نن تینا دشمن تے ہراننا امن و شونہالی ءِ لتاڑنگ اٹ لگوک ءُ ءِ شناخت کننگ کن پرعزم اُن۔ اوپارے کہ ہمودے مراف ہراتم نن دا گندہی نا پوروی اٹ مون ءِ تورینہ۔اسپیکر پارے کہ بلوچستان نا شونداری و شونہالی ساڑی جمہوری حکومت نا اولیت ءِ۔ اوملک اٹی جمہوریت نا سوگوی کن جمہوری ادارہ غاتا نیام اٹ خڑکی رابطہ غاتا گرج آ زور شاغا۔ او پٹ وپول ، کانود نا بشخ و بلوچستان اسمبلی نا باسک و عملہ نا کاریم نا کچ اٹی ودکی کن قومی اسمبلی سیکرٹریٹ و پپس انا کنڈآن ہر وڑنا کمک نا باوری ترفے۔ سردار ایاز صادق ڈل ءِ قومی اسمبلی و اونا قائمہ کمیٹی تا کاریم نا وڑوڈول و قومی اسمبلی سیکرٹریٹ اٹی کفایت شعاری کن چست کروک آ گام گیج ہرافتے ٹی شمسی توانائی آن توانائی نا گرج آتے پورو کننگ و پیپر لیس آفس نا اڈتننگ اوار ءِ، آن معلومدار کرے۔ اوداوخت آ پارلیمانی طرز عمل و کانود سازی نا مسودہ نا تیاری نا سرحال آتے مچ آ ملک انا جامعہ و تعلیمی ادارہ غاتیٹی درستی راستی کرفنگ نا گام گیج آتیان ہم معلومدار کرے۔ اسپیکر بلوچستان اسمبلی راحیلہ حمید خان درانی اسپیکر قومی اسمبلی نا منت واری ءِ ہرفسا ملک انا کانود ساز ادارہ غاتا نیام اٹ خڑکی کمکاری نا سلاہ اٹ امنا کرے۔ اوحکومت نا کنڈآن بلوچستان نا شونداری و امن کن چست کروک آ گام گیج آتا ستاءِ کرے۔ اوپپس اٹی جمہوری ادارہ غاتا باسک و عملہ نا کاریم نا کچ اٹی ودکی کن بناء کروک آ تربیتی پروگرام تاہم ستاءِ کرے و دا اومیت نا درشانی ءِ کرے کہ دا پروگرام گچین کانود سازی و جمہوری ادارہ غاتے سوگو جوڑ کننگ اٹ کمکار جوڑ مریک۔
