پاکستان گدرینگوک آ چار سال اٹی دہشت گردی نا برخلاف اہم ءُ سرسہبی دوئی کرے، چینی سروکی نا بصیرت ڈیہہ ٹی امن و سوگوی ءِ المی جوڑ کننگ کن اہم کڑد ادا کرینے، امن، سوگوی و سیکورٹی آن بیدس شونداری ممکن اف
بیجنگ۔ 26 ستمبر (اے پی پی) بنجائی وزیر داخلہ احسن اقبال پارینے کہ پاکستان علاقائی و جہانی کہول آ امن و سلامتی کن کمکاری نا عزم کرینے، دہشت گردی ، سائبر کرائم ، منشیات نا واپار و انسانی سمگلنگ تون مون تننگ کن اجتماعی کوشست آتا گرج ءِ، پاکستان گدرینگوک آ چار سال اٹی دہشت گردی نا برخلاف اہم ءُ سرسہبی دوئی کرینے، چینی سروکی نا بصیرت ڈیہہ ٹی امن و سوگوی ءِ المی جوڑ کننگ کن اہم کڑد ادا کرینے، امن ، سوگوی و سیکورٹی آن بیدس شونداری ممکن اف۔ او سے شنبے نادے داڑے انٹرپول جنرل اسمبلی نا 86می دیوان نا بنائی دود آن تران کریکہ۔ چین نا صدر شی جن پنگ جنرل اسمبلی نا بناءِ کرے ہراٹی 100 آن زیات ملک آتا 40 انا خڑک وزیرآک شرکت کریر۔ انٹرپول جنرل اسمبلی 29 ستمبر اسکان برجاسلک و داٹی جہانی سلامتی ، انسداد دہشت گردی و منظم ڈوہ اتون اوار چندی اہم معاملہ غاتیا خیال آتا درشانی ءِ کننگک۔ وزیر داخلہ احسن اقبال انٹرپول جنرل اسمبلی آن تران کرسا پارے کہ پاکستان علاقائی و جہانی کہول آ امن و سلامتی کن کمک کننگ نا عزم کرینے۔ اوپارے کہ پاکستان شونداری نا کنڈا پیش گامی کننگ ءِ و دہشت گردی نانشانہ مسنے۔ اوپارے کہ پاکستان گدرینگوک آ چار سال اٹی دہشت گردی نا ناسور ءِ شکست تننگ نا چرجوئی ٹی اہمءُ سرسہبی دوئی کرینے و نن جہانی برادری ءِ تینا آزموندہ غاتا بارواٹی معلومدار کننگ خوانہ۔ اوپارے کہ غٹ کہول آتیا عالمگیریت اسہ ودوک ءُ چیلنج اسے۔ دہشت گردی، سائبر کرائم ، منشیات نا واپار و انسانی سمگلنگ کون آ ویل آتون مون تننگ کن اجتماعی اپروچ اختیار کننگ نا گرج ءِ۔ اوپارے کہ پاکستان اٹی پولیس ڈوہ تا برخلاف قائدانہ کڑدادا کننگ ءِ۔ نن پاکستان نا پولیس ءِ 21می صدی نا گرج آتیان ہم آہنگ کننگ و پوسکن آ وڑوڈول آتیا استوار کننگ نا عزم کرینن۔ اوپارے کہ دہشت گردی و ڈوہدار پیشہ عنصر آک جہانی نیٹ ورک جوڑ کننگ ءُ ہرافتے تون مون تننگ کن ڈوہ اتون جنگ کروک آ تنظیم آتا نیام اٹ کمک وسوگو جہانی نیٹ ورک انا گرج ءِ۔ اوپارے کہ پاکستان انٹرپول نا مسخت آتیا پورووڑاٹ سلنگ نا عزم کرینے و امن و سلامتی ءِ مون آ دننگ کن جہانی برادری اتون اواری اٹ کاریم کننگ نا خواہندار ءِ۔ اوپارے کہ چینی صدر نا گلوبل سیکورٹی گورننس نا وژن وخت انا گرج ءِ۔ دا وژن جامع و شفاف اپروچ اس تخک۔ اوپارے کہ جہانی سلامتی ءِ ہمو وخت اسکان المی جوڑ کننگ مفک ہراوخت اسکان غٹ انا سلامتی گڑتی تے مون آ تخنگپ۔ وزیر داخلہ پارے کہ امن و سلامتی نا بابت کسس تینا و بیگانہ اف۔ غٹ ملک آتے تینا شاری تے زند انا گچین معیار فراوان کننگ کن امن و سوگوی ءِ المی جوڑ کروئی ءِ۔ اوپارے کہ پاکستان چینی صدر نا کنڈآن ڈوہ اتون مون تننگ کن شون ہلوک ملک آتا کاریم نا کچ اٹی ودکی نا چرجوئی ٹی کمک کننگ نا پڑو نا خیرمقدم ءِ کیک۔ وزیر داخلہ احسن اقبال جنرل اسمبلی نا دیوان نا وخت آ روس انا داخلہ امور نا وزیر ولادی میر پوپولو کولتویوف آن بیدس ترکی، تاجکستان و ایلو ملک آتا وزیر آتون ہم اوڑدہی کرے۔ وزیر داخلہ احسن اقبال چین نا کمیونسٹ پارٹی نا سیاسی امور نا باسک منگ جیان ہوتون ہم اوڑدہی کرے ہرا پولیٹیکل اینڈ لیگل کمیٹی آف سی پی سی سینٹرل کمیٹی نا سروک ہم ارے۔ اوڑدہی ٹی چین نا پبلک سیکورٹی نا جوچن گن ہم ساڑی ئس۔ اوڑدہی ٹی ہڑتوم آ کنڈآتا کمکاری و تین پہ تینی است خواہی نامعاملہ غاتیا خیال آتا درشانی ءِ کننگا۔ احسن اقبال اوڑدہی ٹی ہیت وگپ کرسا پارے کہ سی پیک نا ڈٹ پاکستان چین سنگتی کن گیم چینجر اسے نا حیثیت تخک و ہڑتوم آ ملک آتا نیام اٹ ہڑتوم آ کنڈآتا کمکاری مست آن ہم زیات ودانے۔ داکان بیدس چینی میڈیا تون ہیت وگپ کرسا وزیر داخلہ احسن اقبال پارے کہ امن و سلامتی نا نیام اٹ تین پہ تینی رابطہ چین آن جوان اسہ ملک اس ہم سمجھپک، چینی سروکی نا بصیرت چین و ڈیہہ ٹی امن و سوگوی ءِ المی جوڑ کننگ اٹی اہم کڑد ادا کرینے و ہنداسوب ءِ کہ اینو چین ترندی اٹ شون ہلنگ ءِ، مچ آ دنیا ءِ چین نا سرسہبی تیان ہیل کننگ نا گرج ءِ ، امن ، سوگوی و سیکورٹی آن بیدس شونداری ممکن اف۔ اوپارے کہ چین نا تینا سرسہبی تے جہانی برادری ٹی تالان کننگ نا عزم وخت انا اہم ءُ گرج اسے۔ اوپارے کہ گلوبلائزیشن نادوراٹی اسہ ملک اس ہم تنیا شون ہلنگ کپک۔
