نواز شریف نا حاضری آن استثنیٰ نا درخواست آ دلیل آک پورو، فیصلہ فرم جرم بیٹ مننگ آن پدتننگک، عدالت حسین نواز ، حسن نواز، مریم صفدر و کیپٹن (ر) صفدر نا قابل ضمانت وارنٹ دزگیری جاری، سماعت 2اکتوبر اسکان ملتوی
اسلام آباد۔ 26ستمبر (اے پی پی) مسکوہی وزیراعظم محمد نواز شریف سے شنبے نادے احتساب عدالت اٹ پیش مس، احتساب عدالت مسکوہی وزیراعظم محمد نواز شریف ، اونا صاحبزادہ ، صاحبزادی و کیپٹن (ر) صفدر نا برخلاف دائر ریفرنس آتا سماعتءِ 2اکتوبر اسکان ملتوی کرسا حسین نواز، حسن نواز ، مریم صفدر و کیپٹن (ر) صفدر نا قابل ضمانت وارنٹ دزگیری جاری کرے۔ سے شنبے نادے احتساب عدالت نا جج محمد بشیر نیب انا کنڈآن دائر مسہ ریفرنس آتا سماعت ءِ کرے تو داوخت آ مسکوہی وزیراعظم عدالت اٹ پیش مس عدالت اونا حاضری ءِ خلنگ آن پد اودے ہِننگ نا موکل تس۔ سماعت اٹی مسکوہی وزیراعظم نا وکیل خواجہ حارث اونا حاضری آن استثنیٰ نا درخواست ءِ دائر کرسا موقف اختیار کرے کہ محمد نواز شریف نا اُرائی بیمار ءِ و اونا خیالداری کن ہِننگ خواہک ہنداخاطران اودے حاضری آن استثنیٰ تننگے۔ سماعت اٹی نیب انا پراسیکوٹرسردار مظفر عباس حاضری آن استثنیٰ نا درخواست نا مخالفت ءِ کرے۔ نیب انا پراسیکوٹر عدالت ءِ پارے کہ سماعت کن بننگ نا وخت آ اسلام آباد پولیس جاگہ جاگہ غا تلاشی ہلیک ہراڑآن مشکلات آتون مون تروئی تمانے عدالت سیکورٹی کارندہ غاتے حکم ایتے کہ دا اڑاند ءِ شاغنگپ ہراڑآ عدالت حکم تس کہ نی نوشتہی ءُ درخواست اس دائر کر عدالت اوڑآ حکم جاری کیک۔ نیب پراسیکوٹر عدالت ءِ پارے کہ جاتی عمرہ ٹی ساڑی سیکورٹی گارڈزحسن نواز و حسین نواز نا سمن ءِ ہلنگ آن انکار کریر وپاریر کہ او پیشن نا ملک اٹی رہینگرہ سمن ءِ ہمینگ گدریفنگے۔ نیب پراسیکوٹر پارے کہ پاکستانی ہائی کمیشن نا اسسٹنٹ سیکرٹری سمن ءِ وصول کرینے۔ عدالت مسکوہی وزیراعظم نا کنڈآن دائر حاضری آن استثنیٰ نا درخواست آ کڑدہ غاتا دلیل آتے پورو مننگ آن پد حکم تس کہ فرد جرم بیٹ مننگ آن پد داڑآ فیصلہ تننگک۔ عدالت مسکوہی وزیراعظم محمد نواز شریف نا صاحبزادہ حسین نواز، حسن نواز ، صاحبزادی مریم صفدرو سالم کیپٹن (ر) صفدر نا پیش مفننگ آ اوفتا قابل ضمانت وارنٹ دزگیری جاری کرسا 10، 10لکھ روپئی مالیت نا مچلکہ جمع کرفنگ نا حکم تس و سماعت ءِ 2اکتوبر اسکان ملتوی کرے۔ مسکوہی وزیراعظم محمد نواز شریف نا پیشی نا وخت آ پاکستان مسلم لیگ (ن) نا راہشون و کارندہ غاتا بھلو کچ اس ساڑی ئس۔ سماعت نا وخت آ سیکورٹی نا سخت بست و بند کننگاسس۔ یات سلے کہ سپریم کورٹ نا 28 جولائی نا فیصلہ ءِ مون آ تخسا نیب شریف خاہوت نا برخلاف 3ریفرنس احتساب عدالت اٹی دائر کرینے ہرا ایون فیلڈ پراپرٹیز ، العزیزیہ اسٹیل مل و فلیگ شپ انویسمنٹ نا بابت ءُ۔
