پاک بحریہ قومی سلامتی ئِ مون تروک خلیس آتون جوانی اٹ مون تننگ نا لائخی تخک
سی پیک فعال مننگ آن بری و بحری ہڑتوم آ بشخ آتیٹی انفراسٹرکچر نا جال اس شاغنگک
لاہور۔ 25 ستمبر (اے پی پی) صدر مملکت ممنون حسین پارینے کہ پاکستانی قوم ، سلہہ بند فوج و خاص وڑاٹ پاک بحریہ قومی سلامتی ئِ مون تروک ہروڑنا خلیس آتون مون تننگ نا جوانی اٹ لائخی تخک ولے دانا باوجود المی ئِ کہ ڈیہہ ٹی جوہری تالانی، روایتی بحری واک اٹی ودکی کن بھلو کچ اسے آ کروک آ زرکاری ، درستی راستی مروک آ نت نئی ٹیکنالوجی و ہندا وڑنا ایلو روایتی و غیر روایتی چیلنج آتیان آگاہی و اوفتے تون مون تننگ کن پورو ڈٹ بندی و پبی لائخی نا دوئی آ چکار کننگے۔ صدر مملکت داہیت ئِ لاہور اٹی پاکستان نیوی وار کالج نا کنڈآن اڈ ہلوک آ میری ٹائم سیکورٹی ورکشاپ نا ساڑی مروک آتیان تران کرسا پارے ہراٹی چیف آف نیول اسٹاف ایڈمرل محمد ذکاءاللہ ، کمانڈنٹ پاکستان نیوی وار کالج ریئر ایڈمرل معظم ئسک ہم ساڑی ئسر۔ داوخت آ ورکشاپ نا ساڑی مروک آتا تیار کروک میری ٹائم سیکورٹی پالیسی ناپریزنٹیشن ہم تننگا۔ دا پریزنٹیشن ئِ سینیٹر سحرکامران، باسک پنجاپ اسمبلی حسین جہانیاں گرزی و ریئر ایڈمرل شعیب تسر۔ صدر مملکت پارے کہ سمندری وسیلہ غاتے پبی وڑاٹ کاریم اٹ اتسا قومی معیشت ئِ سوگو کننگ تون اوار اوار بحری کسرتا رکھ ہم المی جوڑ کننگ مریک۔ اوپارے کہ میری ٹائم سیکورٹی ورکشاپ پاک چین اقتصادی راہداری نا بابت ہم بھاز اہمیت تخک ہرا اسہ ہندن ئُ اومیت اسے ہراڑآن اقوام عالم و خاص وڑاٹ دا ڈیہہ نا سنہری آخبت وابستہ ئِ۔ صدر مملکت پارے کہ اللہ تعالیٰ پاکستان ئِ بے پناہ وسیلہ و نعمت آتے اٹ سرفراز کرینے ہرافتے ٹی اسہ سمندر اس ہم ارے ہرا اسہ انمول ئُ خزینہ اسے نا حیثیت تخک۔ اوگمان ظاہر کرے کہ پاکستان نا سمندری وسیلہ غاک پبی فائدہ نا ذریعہ جوڑ مریرہ۔ صدر مملکت پارے کہ سمندرآک داکرہ ءارض انا سیاسی و اقتصادی حالیت آتیٹی مدام اہم ئُ کڑد ادا کرینو ولے ساڑی آ دور اٹی اوفتا اہمیت اٹی مستین نا مقابلہ ٹی بھاز زیات ودکی مسنے۔ اوپارے کہ بروک آ دور اٹی حق آتے مون آتخسا المی ئِ کہ دفاع و سلامتی ہی آخا بلکن قومی معیشت نا دا اہم انگا بشخ انا بارواٹی ٹھوس مطالعہ و حکمت عملی نا رداٹ داسی آن سہی اولیت آتا تعین ئِ کننگے تانکہ بدلینگوک آ حالیت آتیٹی ہراتم جہانی واپار و بحری کسر تا رخ پاکستان نا کنڈآ مرے تو دا وارخواہی تیان پبی فائدہ ہرفنگ مرے۔ صدر مملکت پارے کہ داحقیقت بایدے پیش نظر مرے کہ پاک چین اقتصادی راہداری نا فعالی محض اسہ بندرگاہ اسے نا وجود اٹی بننگ و چندی ڈیہہ تے اسہ شاہراہ نا کمک اٹ اسہ ایلو تون ملفنگ نا کاریم ئِ ہی کپک بلکن بری و بحری ہڑتوم آ بشخ آتیٹی انفراسٹرکچر نا جال اس شاغنگک۔ صدر مملکت میری ٹائم سیکورٹی ورکشاپ نا شرکائِ مفید سفارشات پیش کننگ آ مبارکبادی تس و داگمان نا درشانی ئِ کرے کہ ایلو تعلقدار قومی ادارہ غاک دا سفارشات آتیا سجفسا زوت مناسب فیصلہ اس کیرہ۔ صدر مملکت پارے کہ پاک بحریہ میری ٹائم سیکٹر نا شونداری کن تینا کچ اٹنگا وسیلہ غاتا باوجود ہرا بیش بہا قیمت خذمت سرانجام تسنے، داڑآ او مبارکباد نا حقدار ئِ۔ اوگمان نا درشانی ئِ کرے کہ پاک بحریہ و اوڑتون وابستہ ادارہ غاک ہندا قومی جوزہ نا رداٹ پین وخت اس ہم تینا خذمت آتے سرانجام ترسا کیرہ۔
