وزیراعظم شاہد خاقان عباسی اقوام متحدہ نا جنرل اسمبلی ٹی کشمیر نا جھیڑہ تون اوار غٹ علاقائی و جہانی معاملہ غاتیا پاکستان نا موقف ئِ گچین وڑاٹ پیش کرے
اسلام آباد۔ 25ستمبر (اے پی پی) پاکستان مسلم لیگ (ن) نا پارلیمنٹ باسک آک پارینو کہ وزیراعظم شاہد خاقان عباسی اقوام متحدہ نا جنرل اسمبلی ٹی کشمیر نا جھیڑہ تون اوار غٹ علاقائی و جہانی معاملہ غاتیا پاکستان نا موقف ئِ گچین وڑاٹ پیش کرینے، بھارت مقبوضہ کشمیر اٹی بنداو انسانی حق انا خلاف ورزی تیٹی اوار ئِ وخت اس کہ کنٹرول لین و ورکنگ باﺅنڈری آ جنگ بندی نا خلاف ورزی و پدریسہ اشتعال انگیزی کننگ ئِ، پاکستان دنیا خاص کر ڈیہہ ئِ دہشت گردی آن رکھوک جوڑ کننگ کن بے مثل قربانی تسنے، سی پیک علاقائی رابطہ نا ڈٹ اسے ہراڑآن ڈیہہ نا الس کن شونداری و شونہالی نا پوسکن ئُ کسر ملنگک۔ داخیال آتا درشانی ئِ اوفک دوشنبے نا دے ”اے پی پی“ تون ہیت وگپ کرسا کریر۔ سینیٹ نا قائمہ کمیٹی خارجہ امور نا چیئرپرسن سینیٹر نزہت صادق وزیراعظم ئِ خراج تحسین پیش کرسا پارے کہ امریکی صدر ٹرمپ انا سویلی ایشیانا بارواٹی پالیسی نا بابت پارلیمنٹ پاکستان نا ردعمل ئِ گچین وڑاٹ پیش کرے۔ اوپارے کہ پاکستان اسہ وت واجہ ئُ ملک اسے ، دہشت گردی نا برخلاف پاکستان بھلو مالی و جانی قربانی تسنے، اوفتے نہ مننگ نامناسب ئُ ہیت اسے۔ دابابت امور خارجہ کمیٹی نا دیوان اس ہم بٹنگ انگا و داحالیت آتیا سجفنگا وخت اس کہ حکومت دا بابت لائحہ عمل اس طے کننگ کن سفیر آتا کانفرنس اس بٹنگا۔ اوپارے کہ امریکہ ننے آن ڈومور انا خواست ئِ کیک ولے ننے معلوم ئِ کہ ننے انت ڈومور کروئی ئِ۔ اوپارے کہ دہشت گردی نا برخلاف جنگ اٹی سول ملٹری سروک و ایلو غٹ کڑدہ غاتا موقف اسہ وڑئِ۔ آپریشن ضرب عضب امنائی اٹ بناءکننگا وخت اس کہ مچ آ ملک اٹی آپریشن ردالفساد سرسہبی اٹ برجائِ۔ اوپارے کہ ملک اٹی دہشت گردی نا واقعہ غاتیٹی نمان کمتی بسنے، امن و ایمنی نا حالیت آک گچین مسنو، ملک اٹی کاروباری سرجزآتے مون آ دننگانے۔ اوپارے کہ سی پیک آن پاکستان اٹی شونداری نا پوسکن آ دور بناکرینے۔ دا ڈٹ آن نئے بیرہ ڈیہہ بلکن نیامی ایشیائی ملک آتسکان رابطہ غاتے مون آ دننگک۔ اوپارے کہ پاکستان بھارت تون اوار غٹ ہمسایہ ملک و دنیا نا ایلو ملک آتون دوستانہ و گچین تعلقداری خواہک۔ اوپارے کہ وزیراعظم شاہد خاقان عباسی اقوام متحدہ ٹی پاکستان نا نکتہ نظر ئِ ہراوڑاٹ پیش کرے او ستاءکڑزک۔ اونئے بیرہ پاکستان نا بابت بھارت نا عزم ئِ بے نقاب کرینے بلکن او امریکہ و بھارت اٹی دہشت گردی نا برخلاف جنگ اٹی پاکستان نا قربانی تا اعتراف ئِ کرینے، وزیراعظم شاہد خاقان عباسی نا امریکی سروک آتون ہم اوڑدہی مسنے ہراٹی او کشمیر نا ویل ، روہنگیا مسلمان تیا بیدادی و سویلی ایشیائی ڈیہہ ئِ مون تروک چیلنج آتیا ہیت کرینے۔ قومی اسمبلی نا قائمہ کمیٹی امور کشمیر و گلگت بلتستان نا چیئرمین ملک ابرار پارینے کہ سویلی ایشیاٹی امریکی صدر ڈونلڈ ٹرمپ نا پالیسی دوہرہ معیار نا عکاس ئِ ، امریکی صدر دہشت گردی نا برخلاف جنگ اٹی پاکستان نا قربانی تے اول سرآن گوجالنگ ئِ وخت اس کہ بھارت ئِ علاقائی بالادستی ترفنگ کن سرگرم ئِ حالانکہ بھارت مقبوضہ کشمیر اٹی انسانی حق انا سنگین خلاف ورزی تیٹی اوار ئِ وخت اس کہ او پاکستان نا صوبہ بلوچستان و سندھ اٹی دہشت گردی نا واقعہ غاتیٹی اوار ئِ۔ سینیٹر نجمہ حمید پارے کہ وزیراعظم پاکستان شاہد خاقان عباسی اقوام متحدہ نا جنرل اسمبلی آن جامع تران کرے۔ اوکشمیر نا ویل ئِ گچین وڑاٹ جہانی فورم آ تالان کرے وخت اس کہ دہشت گردی نا برخلاف جنگ اٹی پاکستان نا مالی و جانی قربانی و سرسہبی تے ہم گچین وڑاٹ پیش کرے۔ اوپارے کہ نائن الیون آن پد دنیا ٹی دہشت گردی نا برخلاف جنگ انا بابت اسہ پوسکن ئُ بیانیہ اس مون آ بس، پاکستان دہشت گردی نا برخلاف پورو واک اتون بے پرخ جنگ شروع کرے۔
