اسلام آباد۔ 24ستمبر (اے پی پی) وزیراعظم شاہد خاقان عباسی اقوام متحدہ نا جنرل اسمبلی ٹی تینا تران اٹی کشمیر آ اقوام متحدہ نا خصوصی نمائندہ اس تعینات کننگ، پاک امریکہ تعلقداری تے دُوارہ معمول آ اتنگ کن فائدہ مند اوڑدہی تیا تالان امریکہ نا دورہ ءِ پورو کرے۔ تینا 5 دے ئی دورہ ٹی وزیراعظم شاہد خاقان عباسی دہشت گردی نابرخلاف پاکستان نا سرسہبی و جہانی زرکاری کن پاکستان نا درگہ غاتے ملنگ نا بارواٹی جہانی راہشون آتے معلومدار کرے، وزیراعظم شاہد خاقان عباسی نا 18 آن 22 ستمبر آ نیویارک نا دا دورہ اقوام متحدہ نا جنرل اسمبلی نا 72می دیوان آن تران کن ئس ولے او داوخت آ جہانی راہشون، تھنک ٹینکس و بزنس کمیونٹی تون ہم اوڑدہی کرے و اوفتے پاکستان آن دہشت گرد عنصرآتا چٹفنگ و امن نا بحالی کن چست کروک آ گام گیج آتیان معلومدار کرے۔ وزیراعظم پاکستان اٹی دہشت گردی نا بھارتی پشت پناہی نا معاملہ ءِ چست کننگ تون اوار اوار اسلامی کمکار تنظیم (او آئی سی ) و اقوام متحدہ آ زور شاغا کہ او میانمار اٹی روہنگیا مسلمان تا برخلاف مذہبی بنداو تیا مروک آ بیدادی ءِ توریر۔ دورہ ٹی اونا اقوام متحدہ نا جنرل اسمبلی ، اوآئی سی کنٹیکٹ گروپ، میڈیا تون ہیت وگپ و امریکہ ، برطانیہ ، ترکی ، ایران ، اُردن ، نیپال و سری لنکا نا جہانی راہشون آتون اوڑدہی تیا محیط 27 مصروفیات آک مسر۔ اودنیا نا مون آ پاکستان نا کیس ءِ پبی وڑاٹ پیش کرے۔ داکان بیدس وزیراعظم جہانی بینک، ورلڈ اکنامک فورم نا سروک، اقوام متحدہ نا سیکرٹری جنرل و کونسل آف فارن ریلیشن تون ہم ہیت وگپ کرے۔ اقوام متحدہ نا جنرل اسمبلی ٹی تینا دبنگ تران اٹی وزیراعظم شاہد خاقان عباسی بھارت نا کوزہ ٹی کشمیر اٹی تینا حق خودارادیت نا دوئی کن جہد کروک آ کودک الس آ بیدادی تیا گڑتی نا درشانی ءِ کرسا پارے کہ بھارت کشمیری تے توننگ کن واک انا اندھادھند و بے پرخ کاریم اٹ اتنگ ءِ۔ شارٹ گن پیلٹ اٹ چناتے تون اوار ہزار آتا کچ اٹی کشمیری تینا بینائی آن محروم یامعذور مسنو۔ داپین داوڑنا ایلو بیدادی جنیوا کنونشن نا خلاف ورزی و جنگی ڈوہ تا زمرہ ٹی بریک۔ وزیراعظم تینا تران اٹی جنگ آن تباہ حال اوغانستان اٹی امن کن پاکستان خواہش، پاکستان نا انسداد دہشت گردی کن کوشست و قربانی ، دے ٹک نیامی ٹی حالیت، اقوام متحدہ ٹی اصلاحات ، ماحولیاتی بدلی، پاکستان اٹی جمہوریت و معاشی سوگوی آ ہم خیال آتا درشانی ءِ کرے۔ اوہمسایہ غاتون امن اٹ رہینگ انگ نا پاکستانی خواہش نا درشانی ءِ کرسا پارے کہ پاکستان بھارت تون کشمیر تون اوار غٹ دیرینہ جھیڑہ غاتا ایسری کن جامع مذاکرات نا بحالی و امن و سلامتی ءِ برقرار تخنگ کن گام گیج آتیا ہیت و گپ نا خواہندار ءِ ولے اوپارے کہ دا مذاکرات آتے کن بھار ت ءِ پاکستان نا برخلاف ریاستی پشت پناہی اٹ کروک آ دہشت گردی بشمول ننا دیکی سیم انا ایپار آن کروک آ دہشت گردی و بھارت نا کنڈآن پاکستان نا برخلاف تخریب کاری نا مہم آن پاناد کروئی مریک۔ کشمیر نا حالیت آتا ذکر ءِ کرسا وزیراعظم شاہد خاقان عباسی جنرل اسمبلی نا دیوان اٹی شریک مچ آ دنیا نا بڑزکو کہولی ڈل آتے پارے کہ بھارت مقبوضہ کشمیر اٹی کشمیری تے اوفتا حق خودارادیت آن محروم کننگ و جہد آجوئی ءِ دبائفنگ کن 7 لکھ فوج تعینات کرینے۔ اوپارے کہ ساڑی آ تاریخ اٹی درملکی فوج اسے نا کنڈآن تعینات کروک آ دا غٹ آن بھلا کچ ءِ۔ اوپارے کہ اینو کشمیری الس بھارت نا تسلط آن آجو مننگ کن اسہ تاریخی و مقبول جہد اس کننگ ءُ۔ اوپارے کہ او اقوام متحدہ نا جنرل اسمبلی نا 72می دیوان نا کماشی آ میروسلیولجکن ءِ مبارکباد پیش کیک۔ اوپارے کہ اینخو سال جنوری آن داوخت اسکان بھارت فائربندی نا 600 خلاف ورزی کرینے۔ پاکستان داحالیت آتیا سگ انا درشانی ءِ کرینے۔ ولے اگہ کنٹرول لین آ بھارت ہراکہ وڑانا مہم جوئی اسے نا ارتکاب ءِ کیک یا پاکستان نا برخلاف محدود جنگ انا ڈاکٹرین آ عمل کیک تو اودے سوگو و بریبر نا ورندی تننگک۔ دورہ ٹی او بل اینڈ ملینڈا فاؤنڈیشن نا شریک چیئرمین بل گیٹس، ایگزیکٹو چیئرمین ورلڈ اکنامک فورم کلاؤس شیواب، نائب صدر جنرل الیکٹرک جان رائس ، چیف ایگزیکٹو آفیسر ورلڈ بینک کرسٹیلینا جارجیوا و اقوام متحدہ نا سیکرٹری جنرل انتھونیو گیٹسر تون ہم اوڑدہی کرے۔ اومقبوضہ کشمیر اٹی انسانی حق انا خلاف ورزی تیا دستاویزی ڈوزر ہم سیکرٹری جنرل نا حوالہ کرے۔ اوکان پد جمعہ نا دے شاہد خاقان عباسی تینا دورہ ءِ پورو کرسا لندن رادہ مس۔ اقوام متحدہ ٹی پاکستانی سفیر ڈاکٹرملیحہ لودھی ’’اے پی پی‘‘ ءِ پارے کہ وزیراعظم نا دورہ پورو است جم مس و امریکہ تون تعلقداری تے معمول آ اتنگ اٹ کمکار ثابت مریک۔
