ڈیرہ اسماعیل خان ژوب، خضدار بسیمہ ، ژوب کچلاک و نوکنڈی ماشکیل پنجگور روڈ آن پدسلوک انگا علاقہ غاک شونداری نا دوڑ اٹ اوار مریرہ ، گوادر اٹی شونداری کاریم ترندی اٹ برجا
اسلام آباد۔ 24ستمبر (اے پی پی) پاک چین اقتصادی راہداری نا رداٹ بلوچستان اٹی چار پوسکن ءُ شاہراہ تا جوڑ جاڑ نا فیصلہ مسنے ہراٹی دا صوبہ نا مر مر انگا پدسلوک انگا علاقہ غاک شونداری نا پوسکن آ دوراٹی پترینگرہ۔ شاہراہ تتون اوار اوار گوادر بندرگاہ نا شونداری و داڑے فری زون اٹ زرکاری صوبہ ٹی معاشی انقلاب اسے نا پیش خیمہ مریک۔ وزارت ڈٹ بندی نا کمامدارآتا رداٹ سی پیک نا رداٹ ٹرانسپورٹ نا بنداوی ڈھانچہ ءِ شون تننگ کن اڈ ہلوک پاکستان و چین نا اسیجائی رڑ ملک اٹی چندی پوسکن آ شاہراہ تے جوڑ جاڑ کننگ کن مالی کمک فراوان کننگ نا منظوری ءِ تسنے۔دافتے ٹی شاہراہ تا چار ڈٹ بلوچستان اٹی پورو کننگرہ، ہرافتے ٹی اِرا ڈٹ آتیا ہنداسال کاریم بناء کننگ ءِ ، شاہراہ تا جوڑ جاڑ نا فیصلہ بنائی وڑاٹ شش می اسیجائی کمکار کمیٹی نا دیوان اٹی گدرینگوک آ سال مسوسس ولے دا ڈٹ آتا فزیبلٹی پورو مننگ آن پد ٹرانسپورٹ جائنٹ ورکنگ رڑمنظوری ءِ تسنے، بلوچستان اٹی منظور مروک آ ڈٹ آتیٹی پاک چین اقتصادی راہداری نا دیکی روٹ انا ڈیرہ اسماعیل خان آن ژوب سیکشن نا جوڑ جاڑ نا ڈٹ اوار ءِ ہراڑآ ہندا سال چین انا مالی کمک آن جوڑجاڑی کاریم بناء کننگ ءِ، 81 ارب روپئی نا خڑچ آن 210 کلومیٹر مریس چارلین شاہراہ نا جوڑ جاڑ کن ڈغار نا دوئی نا کاریم بناء کرینے، دا شاہراہ نا جوڑ جاڑ آن ویسٹرن روٹ انا داسیکشن اسہ پوسکن ءُ ہائی وے اسے ٹی بدل مریک و خیبر پختونخوا نا علاقہ ڈیرہ اسماعیل خان و اونا نیم قبائلی علاقہ درازندہ و شیرانی و ژوب انا پسماندہ علاقہ شونداری نا پوسکن آ دوراٹی پترینگرہ۔ بلوچستان اٹی خضدار بسیمہ شاہراہ نا جوڑ جاڑ نا کم و ود 20 ارب روپئی نا ڈٹ ہنداسال بناء کننگ والا ءِ ، 110 کلومیٹر مریس دا شاہراہ این 25و این 85ءِ لنک کرسا دا پسماندہ ڈیہہ نا الس ءِ پوسکن ءُ سفری آسراتی فراوان کننگ نا سوب جوڑمریک۔ داڑتون اوار اوار اِرا پوسکن ءُ ڈٹ ژوب کچلاک و نوکنڈی ماشکیل پنجگور روڈ انا فزیبلٹی پورو مننگ آن پد سی پیک نا رداٹ دادے مالی کمک فراوان کننگ نا فیصلہ کننگانے، ژوب کچلاک شاہراہ دیکی روٹ انا اسہ اہم ءُ سیکشن اسے ہرا اسلام آباد ءِ کوئٹہ تون ملفنگ کن گونڈ ءُ کسر اسے نا دروشم اختیار کیک، 305کلومیٹر مریس داشاہراہ ءِ چار رویہ ہائی وے ٹی بدل کننگ کن ڈغار نا دوئی نا کاریم بناءِ و ڈٹ ءِ سی پیک نا شارٹ ٹرم پروجیکٹ یعنی دمدستی وڑاٹ پورو مروک آ ڈٹ آتا فہرست اٹی اوار کننگانے، داڑتون اوار اوار 290 کلومیٹر مریس نوکنڈی، ماشکیل پنجگور روڈ انا مالی کمک نا فیصلہ مسنے، دا ڈٹ این 40 ءِ سی پیک نا شاہراہ این 85تون لنک کیک، ڈٹ انا جوڑ جاڑ آن داروٹ انا فاصلہ 772 کلومیٹر کم مریک و داسوب آن دہ گھنٹہ نا وخت بچک، دا چار پوسکن آ شاہراہ تا جوڑ جاڑ آن بلوچستان اٹی معاشی انقلاب اس بریک ، داجاگہ نا آبادی کن روزگار و کاروبار نا پوسکن ءُ وارخواہی ودی مریک، ایلو کنڈ گوادر شاہراہ نا جوڑ جاڑ و شونداری نا سفر ترندی اٹ برجاءِ، بندرگاہ نا اپ گریڈیشن تون اوار اوار فری زون نا جوڑ جاڑی کاریم آخریکو مرحلہ غاتیٹی پترینگانے، فری زون اٹی زرکاری کن درزن آ درملکی کمپنیک اندراج کرینو، گمان ءِ کہ بنائی مرحلہ ٹی داڑے اسہ بلین ڈالر نا زرکاری مریک و داڑے خلوک آ صنعت آتیٹی ہندی ورناتے ہزارآتاکچ اٹی روزگار نا وارخواہی ودی مریک ، کمامدارآتا پاننگ ءِ کہ سی پیک نا رداٹ برجا داڈٹ آتیان ہندی آبادی ہی فائدہ ہرفک و بلوچستان نا دا علاقہ شونداری نا پوسکن ءُ مزل اس طے کیک۔
