پاکستان دہشت گردی نا واقعہ غاتیٹی اوار مننگ نا بھارتی دوبہ غاتے مسترد کرے
بھارت غٹ ہمسایہ ملک آتیٹی دہشت گردی نا سرپرستی نا کمک اٹ ’’ دہشت گردی نا لمہ ‘‘ نا ہند ءِ دوئی کرینے ، ڈاکٹر ملیحہ لودھی
اسلام آباد۔ 24 ستمبر (اے پی پی) پاکستان دہشت گردی نا واقعہ غاتیٹی اوار مننگ نا بھارتی دوبہ غاتے مسترد کرسا پارینے کہ بھارت تینا ہمسایہ ملک آتیٹی دہشت گردی نا سرپرستی نا کمک اٹ سویلی ایشیاء نا ڈیہہ ٹی ’’ دہشت گردی نا لمہ ‘‘ نا ہند ءِ دوئی کرینے۔ داہیت ءِ اقوام متحدہ ٹی پاکستان نا آخبتی مندوب ڈاکٹر ملیحہ لودھی بھارتی وزیر مملکت خارجہ امور سشما سوراج نا جنرل اسمبلی آن تران اٹی پاکستان نا برخلاف عائد کروک آ دوبہ غاتا ورندی ٹی پارینے۔ اوبھارتی دوبہ غاتے پورووڑاٹ مسترد کرسا اوفتے بہتان تراشی اس گوندا۔ ڈاکٹر ملیحہ لودھی پارے کہ سشما سوراج نا تران آن پاکستان نا بابت بھارتی سروکی نا مخاصمت نا جوانی اٹ اندازہ مننگ ءِ، اسہ ہندن ءُ مخاصمت اس ہرادے نن گدرینگوک آ 70 سال آن سگنگ اُن۔ اوپارے کہ جموں و کشمیر بھارت نا بشخ اف بلکن اسہ متنازعہ ءُ علاقہ اسے ، جموں وکشمیر آ بھارت نا کوزہ غیر کانودی ءِ۔ اوسلامتی کونسل نا تعلقدار قرارداد آتیا عملدرآمد و ااو قرارداد آتیا عملدرآمد کن بھارت ءِ بیوس کننگ نا رداٹ خصوصی ایلچی نا تعیناتی نا خواست کرے وپارے کہ پاکستان بھارت تون مذاکرات کن تیار ءِ ولے داڑکن بھارت ءِ تخریب و بربادی نا مہم ءِ چٹفنگ المی جوڑ کروئی مریک۔ اوپارے کہ بھارت غٹ ہمسایہ ملک آتا برخلاف دہشت گردی و بیدادی نا چرجوئی نا بناءِ کرینے، بھارت دہشت گرد رڑ جوڑ کننگ ءِ، ہمسایہ ملک آتے نزوری آن دوچار کرفنگ نا گام گیج کیک۔ پاکستان نا چندی بشخ آتیٹی تخریب کاری ، لتاڑ و دہشت گردی نا کارروائی تیٹی بھارت اوار ءِ۔ بیدادی نا کنڈآ بھارت نا میلان طبع پوسکن ءُ ہیت اس اف ، آزادی نا 70 سال پد ہم بھارت واک انا کاریم اٹ اتنگ نا اسہ درزن آن زیات واقعہ غاتیٹی اوار ءِ و ہنداسوب ءِ کہ بھارت ءِ تینا گل زمین آ آزادی و بغاوت نا 17 تحریک آتا مون تروئی تمنگ ءِ، بھارت تینا ہمسایہ ملک آتون جنگ و محاذ آرائی کرینے، اقوام متحدہ نا سلامتی کونسل اسہ درزن آن زیات قراردادآتیٹی گوندانے کہ جموں کشمیر نا متکن آ جھیڑہ نا ایسری اقوام متحدہ نا سرپرستی و چاروکی ٹی رائے شماری ءِ ، بھارت دا قرارداد آتے امنا تو کریسس ولے اوفتا عملی اطلاق اٹی بیدادی، بدحواسی ، حیلہ و جان بڈی اٹ کاریم ہلنگ ءِ۔ مقبوضہ کشمیر اٹی بھارتی بیدادی ٹی داوخت اسکان اسہ لکھ آن زیات کشمیری تے شہید کننگانے، مقبوضہ کشمیراٹی بیدادی و ظلم و بربریت نا دامہم داسہ ہم برجاءِ و داسہ چھرہ دار توفک آتا کمک اٹ کشمیری تے مچ آ وئی کن بینائی آن محروم کننگ انگ ءِ ولے کشمیری چناک، زالبول و ورناو نرینہ اونا باوجود روڈ و گلی تیٹی برانز ءِ برجاتخانو و اوفتا بیرہ ہنداخواست ءِ کہ بھارت مقبوضہ کشمیر آ تینا جابرانہ تسلط ءِ ختم کے و کشمیری تے اوفتا مرضی نا رداٹ تینا آخبت نا فیصلہ ءِ کننگ کن اِلنگے۔ اوپارے کہ بھارت ریاستی پالیسی نا وڑاٹ دہشت گردی ءِ کاریم اٹ اتنگ ءِ و بھارتی جاسوس کلبھوشن یادیو پاکستان اٹی دہشت گرد سرجزآتیٹی اوار مننگ نا اعتراف ءِ کرینو۔ ملیحہ لودھی پارے کہ کشمیر بھارت نا بشخ اف ولے بھارت داڑآ غیر کانودی کوزہ کرینے اوپارے کہ بھارت نا کنڈآن کشمیر نا بارواٹی اقوام متحدہ نا قرارداد آتیا عملدرآمد آن انکار بیدادی و دروہی ءِ۔ اوپارے کہ بھارت مقبوضہ کشمیر اٹی بے گناہ کشمیری تیا وحشیانہ بیدادی اٹ جہانی برادری نا چکار ءِ اسہ کنڈ کننگ کن پاکستان نا برخلاف بے بنداو دوبہ خلنگ ءِ، کنٹرول لین آ جنگ بندی ناخلاف ورزی نا توننگ کن جہانی برادری ءِ بھارت آ زور شاغوئی مرے۔ اوپارے کہ پاکستان مذاکرات نا کمک اٹ غٹ ایسر نا چاری ویل آتا ایسری نا خواہش مند ءِ و مذاکرات کن بھارت ءِ دہشت گردی نا پالیسی ءِ اِلوئی مریک۔ اوپارے کہ بھارتی وزیراعظم نریندر مودی تینٹ ہم گجرات اٹی مسلمان تا لس خون اٹی اوار ئس و حکمران جماعت نا ایلو راہشونک ہم بے گناہ خلقت نا خون اٹی اوار ءُ اوپارے کہ بھارت اٹی اسہ اقلیت اس ہم رکھوک اف۔
