بیلٹ و روڈ ڈٹ اسیجائی شونداری نا عکاس ، ملک آتا نیام اٹ کمکاری نا گچین ماڈل و شونہالی و شونداری نا کنڈآ اسہ ٹھوس ئُ کسر اسے، پاکستان نا معیشت اٹی گدرینگوک آ چار سال اٹی شاندار گچینی بس، سی پیک اقتصادی شونداری کن پین اہم کڑد ادا کیک، وزیراعظم شاہد خاقان عباسی

اقوام متحدہ۔ 22 ستمبر (اے پی پی) اقوام متحدہ نا جنرل اسمبلی آن تران کرسا وزیراعظم شاہد خاقان عباسی پارے کہ چینی صدر نا بیلٹ و روڈ انا ڈٹ آن اسیجائی شونداری نا عکاسی مریک و دا ملک آتا نیام اٹ کمکاری نا اسہ گچین ئُ ماڈل و شونہالی و شونداری نا کنڈآ اسہ ٹھوس ئُ کسر اسے۔ وزیراعظم شاہد خاقان عباسی جہانی راہشون آتے پارے کہ پاکستان نا معیشت اٹی گدرینگوک آ چار سال اٹی شاندار گچینی بسنے۔ اوپارے کہ چائنہ پاکستان اکنامک کوریڈور اقتصادی شونداری کن پین اہم کڑد ادا کیک۔ اوپارے کہ پاکستان و چین نا نیام اٹ شریداری، توانائی و ٹرانسپورٹیشن آن ہلیس کیہی ایلو بشخ آتسکان تالان مریک۔ اوپارے کہ پاکستان 207 ملین نا ورناتیا تالان آبادی اتون پراعتماد ئِ کہ او ودوک آ کٹیا ، کھپت و پیداوار ئِ کاریم اٹ اتسا اقتصادی حکومت عملی نا کمک اٹ شونداری نا کنڈآ کاہک۔ اوپارے کہ پاکستان تینا ہدف آتا دوئی کن تینا ملک انا تہٹی و تینا سیم تا ایب وکیب سلامتی نا خواہندار ئِ۔ اوپارے کہ نن غٹ ریاست آتون بریبری و وت واجہی نا بنداو آ گچین تعلقداری نا خواہندار اُن و نن سنگتی و کمکاری نا غٹ پیشکش آتیا مثبت وڑاٹ مون آ کانہ۔