وزیراعظم شاہد خاقان عباسی و نیپال نا وزیراعظم شیر بہادر دیوبا نا نیام اٹ اوڑدہی، ہڑتوم آراہشون تا چندی بشخ خاص کر واپار و سیل و سوات اٹی ہڑتوم آ کنڈآتا کمکاری ئِ پین مون آ دننگ کن عزم انا اعادہ

نیویارک۔ 21 ستمبر (اے پی پی) وزیراعظم شاہد خاقان عباسی و نیپال نا وزیراعظم شیر بہادر دیوبا نا نیام اٹ اقوام متحدہ نا جنرل اسمبلی نا 72 می دیوان نا وخت آ نیویارک اٹی اوڑدہی مس۔ ہڑتوم آ راہشونک چندی بشخ خاص کر واپار و سیل و سوات اٹی ہڑتوم آ کنڈآتا کمکاری ئِ پین مون آ دننگ کن تینا عزم انا اعادہ ئِ کریر۔ داوخت آ وزیراعظم شاہد خاقان عباسی ہڑتوم آ ملک آتا نیام اٹ خوشگوار و دوستانہ تعلقداری تا پارے۔ اونیپال اٹی ساڑی آ جلاب و لینڈ سلائیڈنگ اٹی مروک آ نسخان تیا نیپال نا حکومت و الس تون یکجہتی نا درشانی ئِ کرے و پارے کہ پاکستان دا قدرتی آفت نا زہم آتون مون تننگ کن نیپال ئِ مالی کمک فراوان کننگ ئِ۔ اواسلام آباد اٹی بروک آ سارک سمٹ نا اڈتننگ نا چرجوئی ٹی مخ تفی کننگ آ نیپال نا منت واری ئِ ہرفے و سارک ئِ ڈیہہ نا الس نا مفاد اٹی سرسہب فورم جوڑ کننگ کن پاکستان نا عزم انا اعادہ ئِ کرے۔ وزیراعظم شاہد خاقان عباسی تینا نیپالی ہم منصب ئِ پاکستان نا دورہ نا ہم سلہ خلک۔ داوخت آ نیپالی وزیراعظم سارک ئِ ڈیہہ کن اسہ جوڑجاڑی فورم اس جوڑ کننگ و بروک آ سارک سروکی کانفرنس نا اسلام آباد اٹی اڈ تننگ کن پاکستان نا مخ تفی نا عزم ظاہر کرے۔ نیپالی وزیراعظم وزیراعظم شاہد خاقان عباسی نا جوزہ غاتا خیرمقدم ئِ کرسا اودے نیپال نا دورہ نا سلہ ہم خلک۔