پاکستان نا بابت امریکی پالیسی ٹی ہچ ئُ بھلو بدلی اسے نا اومیت کپنہ ، ننا ملک ٹرمپ انتظامیہ تون خاص کر دہشت گردی نا برخلاف جنگ اٹی کاریم کننگ کن تیار ئِ
نیویارک۔ 21 ستمبر (اے پی پی) وزیراعظم شاہد خاقان عباسی پارینے کہ نن پاکستان نا بابت امریکی پالیسی ٹی بھلو بدلی اسے نا اومیت تخپنہ و ننا ملک ٹرمپ انتظامیہ تون خاص کر دہشت گردی نا برخلاف جنگ اٹی کاریم کننگ کن تیار اُن۔ اقوام متحدہ جنرل اسمبلی نا 72می دیوان نا وخت آ ”سی این این“ ئِ انٹرویو ترسا وزیراعظم شاہد خاقان عباسی پارے کہ ڈیہہ ٹی پاکستان نا کاریم کننگ نا وڑوڈول آ اختلاف رائے مننگ کیک، تعلقداری تیٹی نشیب و فراز بریک، ولے دا تعلقداری تے اوغانستان نا بابت بایدے ہُننگپ، دا 70 سال انا متکن آ تعلقداریک ئُ ، نن مدام امریکہ نا سیوتی مسونن، خاص کر دہشت گردی نا برخلاف جنگ اٹی شریدار اُن، دا تعلقداری تے ہنداتناظر اٹ بایدے ہُننگے۔ امریکی صدر ڈونلڈ ٹرمپ نا پاکستان نا بابت آن پالیسی نا بارواٹی اسہ سوج اسے آ وزیراعظم شاہد خاقان عباسی اودے اختلاف رائے گوندسا پارے کہ پاکستان دا حالیت ئِ جتا ئُ زاویہ اسے ٹی ہرک، ننا ملک دہشت گردی نا برخلاف جنگ کرے و داٹی بھلو نسخان اس سگا۔ اوپارے کہ اینو ہم ہزار آ فوجی دالعنت نا برخلاف جنگ اٹی اختہ ئُ۔ اسہ پین سوج اسے نا ورندی ئِ ترسا وزیراعظم پارے کہ دہشت گردی ہر اسٹ کن خطرہ اسے۔ اوپارے کہ پاکستان ئِ بھارت آن خطرہ ئِ، ہراننا برخلاف مسہ جنگ کرے، او ایمٹی واک اسے، ننے کیہی وار اونا برخلاف دفاع کروئی تما۔ داڑآ سوج کننگا کہ نم ہم تو ایٹمی واک اورے تو وزیراعظم ورندی تس کہ پاکستان بھارت نا خطرہ نا پیش نظر ایٹمی سلہہ جوڑ کرینے۔ امریکی پالیسی ٹی ممکنہ بدلی نا سوج آ وزیراعظم پارے کہ او سے شنبے نادے امریکی نائب صدر مائیک پنس اتون ملانے و اودے دا بابت پاکستان نا موقف آن معلومدار کرینے۔ اوداہیت آ ولدا پارے کہ پاکستان دہشت گردی نا برخلاف جنگ اٹی امریکہ تون کاریم کننگ کن تیار ئِ انتئے کہ دہشت گردی کل انا دشمن ئِ۔ قطبی کوریانا ایٹمی پروگرام نا بارواٹی اسہ سوج اسے آ وزیراعظم پارے کہ قطبی کوریا ئِ جہانی کانود نا بایدے پابندی کروئی مرے۔ اوپارے کہ قطبی کوریا نا ایٹمی پروگرام آ پاکستان ئِ ہم گڑتی ئِ۔
