امریکی کمپنیک پاکستان اٹی زرکاری کیر، ہراڑے اوفتے کن رکھوک چاگڑد ، است ئِ چکوک کٹیا و اوفتے اوفتا ملک آگدریفنگ ئِ المی جوڑ کننگک
نیویارک۔ 21 ستمبر (اے پی پی) وزیراعظم شاہد خاقان عباسی امریکی کمپنی تتون پارینے کہ او پاکستان اٹی زرکاری کیر،ہراڑے اوفتے کن رکھوک چاگڑد ، است ئِ چکوک کٹیا و اوفتے اوفتا ملک اٹی گدریفنگ ئِ المی جوڑ کننگک۔ پاکستان امریکہ بزنس کونسل نا کنڈآن سوارہ آن تران کرسا وزیراعظم پارے کہ پاکستان 2025ءٹی دنیا نا 20 بھلامعاشی واک آتیٹی اوار مریک ، اونا 60 درسد آبادی 30 سال وئی آن کم و 10 کروڑ مڈل کلاس الس آ تالان مریک۔ دے انا اِرغ اٹی بھلا امریکی کمپنی تا سروک و نمائندہ غاک ساڑی ئسر۔ وزیراعظم پارے کہ پاکستان اٹی ہروڑنا پوٹینشل ساڑی ئِ ، ہرادے امنا کننگ نا گرج ئِ۔ اوتدوک آنن بیابخیری نا وخت آ امریکی صدرڈونلڈ ٹرمپ اتون اوڑدہی نا ذکر ئِ کرے۔ اوپارے کہ امریکہ نا نائب صدر مائیک پنس تون مروک آ اوڑدہی ہم بھاز گچین مس۔ اوپارے کہ امریکی سروک نا پاکستان نا بارواٹی رویہ بھاز جوان ئِ و ای ہم اوفتے باوری ترفینٹ کہ پاکستان دہشت گردی نا برخلاف جنگ و تینا گل زمین آن دہشت گردی نا چٹفنگ کن پرعزم ئِ۔ وزیراعظم شاہد خاقان عباسی پارے کہ پاکستان نا حکومت زرکاری نا گرج آتیان جوانی اٹ معلومدار ئِ۔ او باوری ترفے کہ درملکی کمپنی تا غٹ گرج آتے پورو کننگک۔ وزیراعظم پاکستان اٹی سیکورٹی نا بابت قائم خدشہ غاتے پورو وڑاٹ مسترد کرسا پارے کہ پاکستان اٹی کیہی امریکی کمپنی مہالو آن ساڑی ئُ و او جوان کاروبار کننگ ئُ۔ اوجنرل الیکٹرک نا حوالہ ئِ تس ہرا پاکستان نا چندی ڈٹ آتیٹی کاریم کننگ ئِ۔ اوپارے کہ ہراتم نم پاکستان آ بریرے تو بھاز رکھوک آ دوتے ٹی مریرے۔ وزیراعظم پارے کہ امریکی کمپنیک سی پیک اٹی زرکاری کرسا بھلو فائدہ اس کٹیا کننگ کیرہ۔ ہراٹی چین 60 ارب ڈالر نا زرکاری کننگ ئِ۔ اوپارے کہ سی پیک نیامی ایشیائی ملک آتے کن پوسکن ئُ کسر اس ملک۔ پوسکن انفراسٹرکچر ، روڈ و توانائی نا ڈٹ آک ترندی اٹ پورو کننگ انگ ئُ۔ وزیراعظم پارے کہ ملک انا میکرواکنامک ٹک آک گچین مسنو، شرح نمو 4سال آتے ٹی 2.6 درسد آن ودسا 5.3 درسد اسکان رسینگانے۔ ہرا بروک آ سال 6 درسد مریک۔ اوپارے کہ ملک انا اسٹاک ایکسچینج دنیا و ڈیہہ ٹی گچین پرفارم کننگ ئِ۔ وزیراعظم پارے کہ 2018 ءٹی 10 ہزار میگاواٹ ودکی بجلی نیشنل گریڈ اٹی اوار کننگک وخت اس کہ پین ڈٹ ہم پوروی آٹی ئُ ۔ اوپارے کہ جدید لیکو ئیفائیڈ نیچرل گیس ٹرمینل جوڑ جاڑ کرسا قدرتی گیس انا گرج آتے ہم پورو کننگانے۔ اوپارے کہ دیر انا بھلا کوڑی تے ہم ترندی اٹ پورو کننگ انگ ئِ ، ہرافتے آن بجلی ودی کننگک۔ اوپارے کہ پاکستان امن کن 6500سیکورٹی عملہ و 21000 شاری تا قربانی تسنے، دہشت گردی نا بنجاتے چٹفنگانے و پاکستان ئِ پورووڑاٹ رکھوک جوڑ کننگ انگ ئِ ۔ اوپارے کہ دنیا ئِ پرامن جوڑ کننگ کن پاکستان 120 ارب ڈالر نا معاشی نسخان ہرفینے۔
