پاکستان اٹی دہشت گردی نا برخلاف غٹ آن بھلو جنگ اس کننگا دا جنگ ئِ پاکستان تینا وسیلہ غاتے اٹ کرینے
دہشت گردی نا برخلاف جنگ اٹی بے پناہ جانی و مالی نسخان ہرفے، مچ آ دنیا ٹی اگہ ملک اس دہشت گردی نا برخلاف جنگ کننگ ئِ تو او پاکستان ئِ
نیویارک۔ 21 ستمبر (اے پی پی) وزیراعظم شاہد خاقان عباسی پارینے کہ پاکستان اٹی دہشت گردی نا برخلاف غٹ آن بھلو جنگ اس کننگا، دہشت گردی نا برخلاف دا جنگ ئِ پاکستان تینا وسیلہ غاتے اٹ کرینے، نن دہشت گردی نا برخلاف جنگ اٹی بے پناہ جانی و مالی نسخان ہرفین ، مچ آ دنیا ٹی اگہ ملک اس دہشت گردی نا برخلاف جنگ کننگ ئِ تو او پاکستان ئِ ، دہشت گردی نا برخلاف جنگ انا حق اٹی ئِ، پاکستان نا ایٹمی سلہہ غاتا رکھ آ ہچ ئُ سوج اس اف، وخت ثابت کرینے کہ نن ایٹمی سلہہ غاتا معاملہ غا بے کچ زمواراُن، بھارت کنٹرول لین آ بیداد کننگ ئِ ، کشمیراٹی بیدادی آن چکار ئِ اسہ کنڈ کننگ کن بھارت ایل او سی آ بیدادی کیک، کشمیری تا حق خودارادیت نا مخ تفی ئِ برجاتخنہ، ڈیہہ ٹی بھارتی بالادستی ئِ امنا کپنہ، پاک سرزمین اوغانستان نا برخلاف کاریم اٹ اتنگ پننگ ئِ۔ داخیال آتا درشانی ئِ او چارشنبے نادے نیویارک اٹی کونسل آن فارن ریلیشنز اٹی ہیت وگپ اٹی چندی سوج آتا ورندی ئِ ترسا کرے۔ وزیراعظم شاہد خاقان عباسی پارے کہ پاک اوغان سیم آ سیکورٹی مفننگ آن منشیات فروش آک فائدہ ہرفنگ ئُ ، پاک اوغان بارڈر ئِ مینج کننگ نا گرج ئِ۔ اوپارے کہ پاکستان دہشت گردی نا برخلاف جنگ اٹی بے پناہ جانی و مالی نسخان ہرفینے۔ اسہ سوج اسے نا ورندی ٹی وزیراعظم شاہد خاقان عباسی پارے کہ نن سمجھپنہ کہ اوغانستان اٹی بھارت نا کڑد اسے۔ اوغانستان اٹی امن کن ہروڑنا ہیت وگپ کن تیار اُن۔ اوپارے کہ مچ آ دنیا ٹی اگہ ملک اس دہشت گردی نا برخلاف جنگ کننگ ئِ تو او پاکستان ئِ۔ پاکستان اٹی حقانی نیٹ ورک انا بابت وزیراعظم پارے کہ پاکستان اٹی حقانی یا دُن ئُ پین نیٹ ورک اسے نا ہچ ئُ وجود اس اف۔ وزیراعظم شاہد خاقان عباسی سی پیک نا بارواٹی سوج انا ورندی ٹی پارے کہ سی پیک اقتصادی شونداری نا اہم ئُ بشخ اسے۔ پاک امریکہ تعلقداری نا چرجوئی ٹی سوج انا ورندی ٹی وزیراعظم پارے کہ پاک امریکہ تعلقداری ٹی ہچ ئُ اڑاند اس اف۔ پاک امریکہ تعلقداری70 سال آ تیا ٹی ئِ۔ ننے مالی امداد آخا جہانی مارکیٹ اٹی رسینگ درکار ئِ۔ اسہ پین سوج اسے نا ورندی ٹی وزیراعظم شاہد خاقان عباسی پارے کہ پاکستان اٹی وزیراعظم تنیا ہچ ئُ فیصلہ اس کننگ کپک۔ غٹ فیصلہ غاک صلابت اٹ مریرہ۔ پاکستانی آئین اٹی وزیراعظم نا کڑد صفائِ۔ اوپارے کہ قبائلی علاقہ غاتا قومی دنگ اٹی اوار مننگ کن کانود سازی کننگ اُن۔ ایٹمی میرات آتا رکھ انا بارواٹی سوج آ وزیراعظم پارے کہ ایٹمی میرات آتا سوگو کنٹرول اینڈ کمانڈ سسٹم تخنہ۔ پاکستان نا ایٹمی سلہہ غاتا رکھ آ ہچ ئُ سوج اس ہی اف۔ وخت ثابت کرے کہ نن ایٹمی سلہہ غاتا معاملہ غا بے کچ زموار اُن۔ اسہ پین سوج اسے نا ورندی ٹی وزیراعظم پارے کہ دہشت گردی نا برخلاف جنگ اٹی پاکستان ارب آ ڈالر نا نسخان ہرفے۔ اسامہ بن لادن نا بارواٹی سوج انا ورندی ٹی وزیراعظم پارے کہ نن تون اسامہ بن لادن نا ہموڑے ساڑی مننگ نا معلومداری اَلوکہ۔ خواہش ئس کہ اسامہ بن لادن کن ایکشن آن مست پت اٹی اَلنگاکہ۔ اوپارے کہ پاکستان اٹی دہشت گردی نا برخلاف غٹ آن بھلا جنگ ئِ کننگا وپاکستان دہشت گردی نا برخلاف داجنگ ئِ تینا وسیلہ غاتے اٹ کرینے و کننگ ئِ۔
