پاکستان دہشت گردی نا برخلاف جنگ اٹی پما خ شریدار ئِ، پاکستان اوغانستان تون سیم آ بے ڈول انگا علاقہ ٹی شدت پسند آتا کنڈآن کاریم اٹ اتوک آ غٹ ہند جاٹ آتے ماس آن کشانے، پاکستان اٹی داتاثر ئِ کہ دہشت گردی نالعنت نا برخلاف اونا غٹ تر کوشست آتاامریکہ نا کنڈآن است بڈی کننگ تنے
واشنگٹن۔ 21 ستمبر (اے پی پی) وزیراعظم شاہد خاقان عباسی پارینے کہ پاکستان دہشت گردی نا برخلاف جنگ اٹی اسہ پماخ ئُ شریدار اسے و او اوغانستان تون سیم آ بے ڈول انگا علاقہ ٹی شدت پسند آتا کنڈآن کاریم اٹ اتوک آ غٹ ہند جاٹ آتے ماس آن کشانے۔ اوداہیت ئِ ”نیویارک ٹائمز“ ئِ تروک آ انٹرویو ٹی پارے ہرا چارشنبے نادے شینک مس۔ وزیراعظم ہرا اقوام متحدہ جنرل اسمبلی نا دیوان اٹی بشخ ہلنگ کن نیویارک اٹی ئِ، پارے کہ پاکستان اٹی داتاثر ئِ کہ دہشت گردی نا لعنت نا برخلاف اونا غٹ تر کوشست آتا امریکہ نا کنڈآن است بڈی ئِ کننگ تنے و ننے قربانی نا ایٹ اس جوڑ کننگ انگ ئِ۔ اوپارے کہ نن دہشت گردی نا برخلاف فعال پاٹنر اُن۔ داڑے داہیت ذکر انا قابل ئِ کہ دُن کہ امریکی میڈیا ٹی رپورٹ مس کہ پاکستان نا بابت پوسکن آ امریکی پالیسی و بھارت نا کنڈآن اونا شیف توننگ آن ملک اٹی شدید ردعمل اس خننگک و جاچکار آک خبر دارکرینو کہ پوسکن آ امریکی پالیسی نا کارگر مننگ نا گمان اف و اوڑآن اوغانستان اٹی امن نا مسخت آتا دوئی ٹی مشکل ودی مریک وخت اس کہ ارٹ میکو کنڈ پاکستان ہرا دہشت گردی نا برخلاف جہانی جنگ اٹی بھلو بہاءاس تسنے ، وار وار داہیت آ زورشاغانے کہ او دہشت گرد آتا برخلاف بے پرخ کارروائی کننگ ئِ و انتہاءپسند عنصرآک نرنگ ئُ و او ہمسایہ اوغانستان اٹی پناہ ہلکونو۔ وزیراعظم نیویارک ٹائمز ئِ انٹرویو ٹی پارے کہ پاکستان نا سلہہ بند فوج اوغانستان تون سیم آ دہشت گرد آتا کاریم اٹ اتوک آ غٹ ٹھکانہ غاتا چٹفینے۔ شاہد خاقان عباسی دوٹوک لوز اٹی پارے کہ پاکستان نا فوج علاقہ غا دُوارہ کنٹرول دوئی کرینے و داسہ دہشت گردآتا ہچ ئُ وڑاسے ٹی ہچ ئُ وڑاسے نا ٹھکانہ اف۔ نیویارک ٹائمز وزیراعظم نا بابت پارے کہ پاکستان تون ٹیکٹیکل نیوکلیئر سلہہ اف۔ اوپارے کہ پاکستان تون گونڈئُ فاصلہ سے آ خلوک آ نیوکلیئر سلہہ ئِ ہرا میدان جنگ اٹی کاریم اٹ اتنگ کن ڈیزائن کننگ تنے و داسخت رکھی کمانڈ اینڈ کنٹرول اٹی ئِ۔
