ایران ایٹمی معاہدہ ئِ پرغنگ نا بابت اول گام ہرفپک،ایلو فریق نا کنڈآن اونا خلاف ورزی نا سخت و سوگو ورندی ئِ ایتک
امریکی حکومت جہانی معاہدہ غاتا خلاف ورزی ئِ کرسا بیرہ تینا جہانی پن ئِ زہمی کیک، ایٹمی معاہدہ نا پِننگ آن ایران ئِ ہچ ئُ نسخان اس مفک
نیویارک۔ 20 ستمبر (اے پی پی) اسلامی جمہوریہ ایران نا صدر ڈاکٹر حسن روحانی پارینے کہ ایران ایٹمی معاہدہ ئِ پرغنگ نا بابت اول گام ہرفپک ولے ایلو فریق نا کنڈآن اونا خلاف ورزی نا سخت و سوگو ورندی ئِ ایتک۔ امریکی حکومت جہانی معاہدہ غاتا خلاف ورزی ئِ کرسا بیرہ تینا جہانی پن ئِ زہمی کیک۔ ایٹمی معاہدہ پِننگ نا دروشم اٹی ایران ئِ ہچ ئُ نسخان اس مفک۔ چارشنبے نا دے نیویارک اٹی اقوام متحدہ نا جنرل اسمبلی نا ہفتاد ئُ دو می دیوان آن تران کرسا ایران نا صدر ڈداکٹر حسن روحانی پارے کہ اگہ جامع ایٹمی معاہدہ ، پڑ سیاست نا نابود آتا دوٹی لتاڑنگک تو دا بے کچ افسوزناک مریک ولے داڑآن ایران نا شونداری و پیش رفت نا عمل ہرگز زہمی مفک۔ صدر حسن روحانی دوٹوک لوز اٹی پارے کہ امریکی حکومت جہانی معاہدہ غاتا خلاف ورزی ئِ کرسا بیرہ تینا ساکھ ئِ زہمی کیک، مذاکرات و معاہدہ غاتا بابت دنیا نا غٹ قوم و حکومت آتا امریکہ غا پت چٹک۔ صدر حسن روحانی اسہ وار ولدا تہران نا دا موقف نا اعادہ ئِ کرے کہ جامع ایٹمی معاہدہ اِراسال نا مذکرات اٹی انجام ہلکونے، اقوام متحدہ نا سلامتی کونسل و جہانی برادری سلامتی کونسل نا قرارداد بیست ئُ دو سی ئُ یک انا کمک اٹ دا نا مخ تفی ئِ کرینے۔ صدر نا پاننگ ئس کہ جامع ایٹمی معاہدہ بیرہ اسہ یا اِرا ملک آتون تعلق تخپک بلکن دا سلامتی کونسل نا اسہ دستاویز اسے و دانا تعلق مچ آ جہانی برادری تون ئِ۔ صدر حسن روحانی ایران نا دفاعی واک و توانائی تا ذکر ئِ کرسا پارے کہ ایران نا میزائل پروگرام بیرہ و بیرہ دفاعی وڑانا ئِ و دانا مسخت ڈیہہ نا امن و سوگوی ئِ رکھوک کروئی ئِ ۔ علاقائی تنکی تا ذکر ئِ کرسا صدر حسن روحانی پارے کہ ننا ڈیہہ ٹی پیشن نا واک آتا نیام تمنگ اٹی نزوری ودی مسنے۔ اوپارے کہ پیشن نا واک آک ڈیہہ ٹی نیام تمنگ و بھس کن سلہہ بہاءکنننگ کن ایران آ بدامنی تالان کننگ نادوبہ ئِ خلنگ ئُ۔ اوپارے کہ ای صفا کننگ خواوہ کہ پیشن نا نیام تمنگ و ڈیہہ نا خلقت آ تینا مرضی ئِ مسلط کننگ اٹی تنکی تالان مریک و و برجاسلک۔ صدر پارے کہ شام ، یمن و بحرین نا تنکی تا ہچ ئُ فوجی ایسری اس اف بلکن بیدادی نا توننگ، و الس نا رائے نا شرف ئِ کرسا اوتنکی تے چٹفنگ مریک۔ صدر حسن روحانی پارے کہ اینو نا دنیا ٹی ملک آتا سلامتی ، سوگوی و شونداری اسہ ایلو تون گنڈوک ئِ۔ دامننگ کپک کہ فلسطین نا الس اسہ شرپسند و نسل پرست حکومت اسے نا دوتے ٹی کمترین انسانی حق آن محروم مریر و دا گل زمین آ غاصبانہ کوزہ کروک آ محفوظ سلر۔ صدر پارے کہ دا ہراوڑمننگ کیک کہ یمن، شام ، عراق ، بحرین ، اوغانستان ، میانمار و بھاز انگا ایلو علاقہ غاتا الس نیزگاری، جنگ و جھیڑہ غاتا عالم اٹی زند ئِ تدیفر و گڑاس خلقت داسمجھسا کریر کہ او تینا ملک آتیٹی امن وسلامتی و شونداری اتنگ کیرہ۔ صدر حسن روحانی پارے کہ صدر پارے کہ نن تینا تہذیب ،دودوربیدہ ، مذہب و انقلاب ، خلقت نا است آتیٹی پتریفنگ خوانہ و عقل و منطق اٹ ہیت کینہ۔
