تعلیم نا مون آ دننگ ساڑی آ حکومت نا اولیکو اولیت ئِ، اواری اٹ کاریم کننگ کن ہر چار آ صوبہ غاتا وزیراعلیٰ تے چھٹی اس نوشتہ کرینٹ
وزیراعظم شاہد خاقان عباسی نا ملالہ یوسفزئی تون ہیت وگپ
نیویارک۔ 21 ستمبر (اے پی پی) وزیراعظم شاہد خاقان عباسی تون نیویارک اٹی نوبل انعام ہلوک ملالہ یوسفزئی اوڑدہی کرینے۔ وزیراعظم آفس آن جاری بیان نا رداٹ وزیراعظم تون اوڑدہی ٹی ملالہ یوسفزئی وزیراعظم ئِ پاکستان اٹی تعلیم خاص کر زالبول نا تعلیم نا مون آ دننگ کن تینا کوشست آتیان معلومدار کرے۔ اواومیت ظاہر کرے کہ وزیراعظم شاہد خاقان عباسی پاکستان اٹی تعلیم نا چیمپیئن ثابت مریک۔ وزیراعظم شاہد خاقان عباسی پاکستان اٹی تعلیم خاص کر مسن تا تعلیم نا مون آ دننگ کن ملالہ یوسفزئی نا کوشست آتا ستائِ کرے و پارے کہ تعلیم نا مون آ دننگ ساڑی حکومت نا ایجنڈا ٹی اولیکو اولیت ئِ۔ تعلیم اٹی زرکاری آن بیدس اسہ ہم زرکاری اس منافع بخش مفک۔ اوپارے کہ گدرینگوک آ چارسال اٹی تعلیم نا بشخ اٹی گچینی ساڑی آحکومت نا اولیت آتا شاہدی ئِ۔ وزیراعظم پارے کہ ای ہرچارآ صوبہ غاتا وزیراعلیٰ تے چھٹی نوشتہ کرینٹ کہ ببو تعلیم نا مون آ دننگ و گچینی کن اواری اٹ کاریم کین۔ وزیراعظم پنجاپ اٹی تعلیم نا میدان اٹی شاندار کارکڑد آ حکومت پنجاپ نا ستائِ کرے و پارے کہ پنجاپ حکومت ڈی ایف آئی ڈی تون اواری اٹ صوبہ ٹی تعلیم ئِ مون آ درینے ہراٹی اسکول آتیٹی انرولمنٹ اٹی ودکی مسنے۔ اوپارے کہ حکومت داسہ تعلیم نا نصاب آ چکار کننگ ئِ ہراٹی تاریخ ، میتھمیٹکس و سائنس نا بشخ آک اوار ئُ ہرافتا کمک اٹ طالب علم آتا پٹ وپولی و جاچکاری لائخیک پین ودرہ۔ وزیراعظم پارے کہ حکومت این جی او و صوبائی حکومت آتون ہم رابطہ ٹی ئِ تانکہ دامسخت آتے دوئی کننگ مرے۔
