پاکستان ناشرکاری ءِ ھلاپءِ جنگ ءَ یک کار کنوکیں شریدار اِت، پاکستان ءَ اوگانستان ءِ گوما سیمسرآنی سرءَ دمگاں ناشرکارانی نیمگءَ چہ کارمرز بوھوکیں دراھیں ٹھکانگ روہتگاں چہ ھلاس کتگ اَنت،
پاکستانءَ اے ھیال اِت کہ امریکہ ءِ نیمگءَ چہ پاکستانءِ کوشستانی دلبڈی کنگ نہ بوتگ
واشنگٹن۔21ستمبر(اے پی پی) مزن وزیر شاہد خاقان عباسی ءَ گشتگ کہ پاکستان ناشرکاری ءِ ھلاپ ءِ جنگءَ یک کارکنوکیں شریدار اِتءُ آئیءَ اوگانستان ءِ گوما ھوار سیمسرآنی سرءَ مشکلیں دمگاں ناشرکارانی نیمگءَ کارمرز کتگیں دراھیں ٹھکانگ روہتگاں چہ ھلاس کتگ اَنت۔ آئیءَ اے گپ ’’ نیویارک ٹائمز‘‘ ءَ را داتگیں گلگودار ءِ تہا گشتگ اَنت کہ چارشمبےءِ روچءَ شنگ بوتگ۔ مزن وزیر کہ اقوام متحدہ جنرل اسمبلی ءِ دیوان ءَ ھوار بوھگءِ ھاترءَ نیویارک ءَ اِنت ، آئیءَ گشتگ کہ پاکستانءِ تہا اے لیکہ اَست اِنت کہ ناشرکاری ءِ نعلت ءِ ھلاپ ءَ آئیءِ دراھیں کوشستانی امریکہ ءِ نیمگءَ چہ دلبڈی کنگ نہ بوتگ ءُ مارا قربانی ءِ براک جوڈ کنگ بوھگءَ اِنت۔ آئیءَ گشتگ کہ مہ ناشرکاری ءِ ھلاپءَ کارکنوکیں شریدار اَنت۔ اِدءَ اے گپ کنگ الم انت کہ انچوکہ امریکی ھال درءَ رپورٹ بوتگ کہ پاکستان ءِ ھوالگءَ نوکیں امریکی پالیسی ءُ بھارت ءِ نیمگءَ چہ آئیءِ دیم کنگءَ چہ ملکءِ تہا ترندیں ردعمل دیم ءَ کیئت ءُ تجزیہ نگاراں کھڈن کتگ کہ نوکیں امریکی پالیسی ءِ کار کنگءِ امکان نیست ءُ ایشیءَ چہ اوگانستان ءَ امنءُ ایمنی ءِ مول ءُ مراد ءِ حاصل کنگءَ گرانی ودی بیت وھدے کہ دومی نیمگءَ پاکستان کہ آئیءَ ناشرکاری ءِ ھلاپ میاں اوستمانی جنگءَ مزنیں کساسے ءَ قربانی داتگ ، آئیءَ اے گپءِ سرءَ زور پِرداتگ کہ ناشرکاری ءِ ھلاپءَ بے ریاحءُ روح ءَ کاروائی کنگءَ اِنت ءُ بیم کار تچگءَ اَنت ءُ آھاں ھمساھگ ملک اوگانستانءَ پناہ زُرتگ۔ مزن وزیر ءَ نیویارک ٹائمزءَ را داتگیں گلگودارءِ تہا گشتگ کہ پاکستان ءِ سلاھ بندیں فوج ءَ اوگانستان ءِ گوما سیمسرآں آ دیم آھانی ٹھکانگ تباھ کتگ اَنت ۔ شاہد خاقان عباسیءَ پچیں لبزاں گشتگ کہ پاکستانءِ فوجءَ دمگءِ سرءَ یک رندے پدا کنٹرول ھاصل کتگ ءُ نوں ناشرکاراناں ایچ ٹھکانگ نیست۔ نیویارک ٹائمز ءَ مزن وزیر ءِ ھوالگءَ گشتگ کہ پاکستانءِ گورءَ ٹیکٹیکل نیوکیئر سلاھ نیست۔ آئیءَ گشتگ کہ پاکستانءِ گورءَ گونڈیں دوریءِ سرءَ اُرش کنوکین نیوکلیئر سلاھ اَست کہ جنگءِ پڑءَ کارمرز کنگءِ ھاترءَ جوڈ کنگ نہ بوتگ ءُ اے ترندیں حفاظتی کمانڈاینڈ کنٹرول ءِ تہا اَنت۔
