آرمی چیف جنرل قمر جاوید باجوہ پین چار دہشت گرد آتا سزائے موت ءِ پک کرے

راولپنڈی۔ 20 ستمبر (اے پی پی) پاک فوج انا سروک جنرل قمر جاوید باجوہ پین چار دہشت گرد آتا سزائے موت ءِ پک کرینے ہرا دہشت گردی ، فوجی کارندہ غاتا برمتہ و شہید کننگ، کانود نافذ کروک آ ادارہ و سلہہ بند فوج آ جلہو کون آ سنگین ڈوہ تیٹی زموار گوندنگار۔ دا دہشت گرد آک 21 بندغ نا خون و اسہ بندغ اسے ٹھپی کننگ اٹی اوار ئسر و اوفتا کوزہ آن سلہہ و گولہ بارود ہم دوئی مس۔ دزگیری آن پد دادہشت گرد آتا فوجی عدالت آتیٹی ٹرائل کننگا و اوفتے سزائے موت بنفنگا۔ دادہشت گرد آتیٹی شبیر احمد ولد محمد شفیق اوار ءِ ہرانا تعلق کالعدم تنظیم آن ءِ ، دا سلہہ بند فوج آ جلہو و میجر عدنان تون اوار 10 فوجی ءِ شہید کننگ اٹی زموار گوندنگا۔ دادہشت گرد چار فوجی تے برمتہ و شہید کننگ اٹی ہم اوار ئس ، او مجسٹریٹ و ٹرائل کورٹ انا مون آ تینا ڈوہ ءِ امنا کرے۔ سزائے موت کنوک آ ارٹ میکو دہشت گرد عمر خان ولد احمد خان ءِ، دانا تعلق ہم کالعدم تنظیم آن ءِ و داہم سلہہ بند فوج آ جلہو آتیٹی اوار ئس و او مسہ سپاہی ءِ شہید کرے۔ دوبہ دار ہزارہ ٹی گورنمنٹ گرلز پرائمری اسکول ءِ بھس کننگ اٹی ہم اوار ئس و اونا کوزہ آن سلہہ و گولہ بارود دوئی مس، اوہم مجسٹریٹ و ٹرائل کورٹ انا مون آ امنا کرے۔ مسٹ میکو دہشت گرد طاہر علی ولد سید نبی ہم کالعدم تنظیم نا باسک و سلہہ بند فوج آ جلہو آتیٹی اوارءِ ، اوڑآ اِرا فوجی ءِ شہید کننگ نا ڈوہ ٹی مقدمہ ءِ چلیفنگا و او ہم مجسٹریٹ و ٹرائل کورٹ اٹی تینا ڈوہ ءِ امنا کرے۔ سزائے موت کنوک آ چارمیکو دہشت گرد آفتاب الدین ولد فرخ زادہ ہم کالعدم تنظیم نا باسک اسے و کانود نافذ کروک آ ادارہ غاتیا جلہو اٹی اوار ءِ ہراٹی اسہ پولیس آفیسر اس شہید و ٹھپی مس۔ اونا کوزہ غان ہم سلہہ و گولہ بارود دوئی مس و اوہم مجسٹریٹ و ٹرائل کورٹ انا مون آ تینا ڈوہ ءِ امنا کرے ہراڑآ اودے سزائے موت بنفنگا۔