نیویارک۔ 20 ستمبر (اے پی پی) وزیراعظم شاہد خاقان عباسی پارینے کہ پاکستان ءِ سندھ طاس معاہدہ نا شرط آتا بارواٹی ہچ ءُ ابہام اس اف ، نن تین پہ تینی مذاکراتی ایسری اس پٹنگ کن جہانی بینک اتون اختہ عمل مننگ نا خواہندار اُن۔ اوداہیت ءِ جہانی بینک انا سی ای او کرسٹالینا جارجیو ا تون ہیت وگپ کرسا پارے ہراچارشنبے نادے داڑے اوڑتون اوڑدہی کرے۔ سی ای او پاکستان تون اواری اٹ کاریم ءِ برجاتخنگ نا عزم انا درشانی ءِ کرسا میکرو اکنامک فریم ورک انا سوگوی ٹی پاکستان نا پیش رفت انا ستاءِ کرے۔ اوپاکستان اٹی پین اصلاحات نا مخ تفی ءِ برجاتخنگ نا عزم ہم ظاہر کرے۔ او سندھ طاس معاہدہ ٹی پاکستان نا مثبت و جوڑ جاڑی کڑد انا ستاءِ کرسا پارے کہ جہانی بینک داسہ معاہدہ ٹی مون آ ہِننگ نا کسر ءِ پٹنگ اٹی ءِ۔ وزیراعظم شاہد خاقان عباسی تربیلا 4 و تربیلا 5 و داسو ہائیڈرو پاور ڈٹ اٹی جہانی بینک انا کمکاری نا ستاءِ کرسا دیامر بھاشا ڈیم اکن ہم جہانی بینک انا کمکاری ءِ خواہس ہرا ملک انا آبی رکھ انا گرج آتے کن اہم ءِ۔ اوپارے کہ نن ڈٹ انا دیر و بجلی نا اجزاتے جتا کننگ دُن کہ گڑاس جدت نا حامل ایسری آ کاریم کننگ کن تیار اُن۔ ہڑتوم آ کنڈآک رابطہ و کمکاری ءِ برجاتخنگ آ اتفاق کریر۔
