اسلام آباد۔ 20 ستمبر (اے پی پی) صدر مملکت ممنون حسین نا ساڑی آ دورہ ترکمانستان آن ہڑتوم آ ملک آتا تین پہ تینی و علاقائی تعلقداری تے پین سوگو کننگ اٹی پبی کمک رسینگک۔ دفترخارجہ نا کنڈآن جاری اسہ بیان اسے ٹی پاننگانے کہ پاکستان و ترکمانستان نا تین پہ تینی تعلقداریک سوگو و پائیدار بنداو تیاٹی ءُ و دا تعلقداریک چندی بشخ آتیٹی بھاز ترندی اٹ سوگو مننگ ءُ۔ صدر مملکت ممنون حسین ترکمانستان نا ہم منصب نا سلہ غا اشک آباد نا دورہ ءِ کرے و ہموڑے 16آن 18 ستمبر اڈ ہلوک آ ایشین انڈور اینڈ مارشل آرٹس گیمز انا بنائی دود اٹی شرکت کرے۔ پاکستان نا 130 باسکی دستہ 9 چندی گوازی تیٹی شرکت کرے۔ داوخت آ صدر مملکت ممنون حسین ترکمانستان نا صدر ایمان علی رحمانوف تون اوڑدہی کرے و تین پہ تینی است خواہی نا معاملہ غاتیا خیال آتا درشانی ءِ کریر۔ پاکستان و ترکمانستان تاپی گیس پیپ لین ڈٹ اٹی پیش رفت آ ہم کاریم کننگ ءُ ہراڑآن پاکستان نا توانائی نا گرج آتے پورو کننگ اٹی خاطر خواہ کمک رسینگک۔
